Aŭtar – viadomy biełaruski historyk i kartohraf, jaki ŭ 2011 hodzie zaŭčasna pamior paśla ciažkaj chvaroby va ŭzroście ŭsiaho tolki 36 hadoŭ. U dadzienaj knizie faktyčna padsumoŭvajecca toje, što jon paśpieŭ za svajo karotkaje žyćcio zrabić.
Asobnyja raździeły knihi ŭpieršyniu ŭ ajčynnaj histaryjahrafii dazvalajuć prasačyć transfarmacyju ŭschodniaj miažy Vialikaha Kniastva Litoŭskaha na praciahu XIV — pieršaj pałovy XVI st.
Vyznačeńnie litoŭska-maskoŭskaj miažy razhladajecca na fonie raźvićcia adnosin dźviuch najbujniejšych dziaržaŭ Uschodniaj Jeŭropy, VKŁ i Vialikaha Kniastva Maskoŭskaha: ad pieršych terytaryjalnych kantaktaŭ i kanfliktaŭ druhoj pałovy XIV st. da ŭstalavańnia tryvałaj miažy i pamiežnych vojnaŭ XV — pieršaj treci XVI st.
Asobny raździeł pryśviečany losu Homiejskaj vołaści, jakaja na praciahu doŭhaha času zajmała pamiežnaje stanovišča pamiž VKŁ i Vialikim Kniastvam Maskoŭskim.
U dadatku źmieščany pracy aŭtara pa prablemach histaryjahrafii, krynicaznaŭstva i rehijanalnaj historyi, źviazanyja z ahulnaj temaj. Kaštoŭnaść knihi ŭzmacniajuć padrychtavanyja aŭtaram histaryčnyja karty (usiaho 31, ź ich 25 kalarovyja), šerah ź jakich nadrukavanyja ŭpieršyniu. Kniha vyjšła ŭ ćviordaj vokładcy.
Źmiest knihi i infarmacyja, jak jaje zamović jość na sajcie časopisa Arche.
«Navukovuju, a ŭ peŭnym sensie i palityčnuju cikavaść vyklikajuć vysnovy, zroblenyja aŭtaram, — adznačajecca ŭ pradmovie. — Hałoŭnaja siarod ich taja, što, niahledziačy na doŭhi i składany praces składvańnia miažy pamiž Biełaruśsiu i Maskoŭskaj dziaržavaj, na šerah pamiežnych vojnaŭ, inšych najpierš palityčnych padziej,
«litoŭska-maskoŭskaja miaža» «ŭžo z pačatku XVI st. vyjaŭlała dziaržaŭnyja miežy sučasnaj Respubliki Biełaruś.
Heta sapraŭdy dziŭna, bo viadoma, što miežy Biełarusi składvalisia nie ŭ adpaviednaści z naturalnym terytaryjalnym raźvićciom abo areałam raśsialeńnia biełaruskaha etnasu, a pavodle palityčnych rašeńniaŭ. Jak by tam ni było, ale da siońniašniaha dnia praciahvajuć svajo isnavańnie miežy, zakładzienyja jašče ŭ pačatku XVI, a moža i ŭ XV st.».
Naprykancy adznačym, što publikacyjaj hetaj navukovaj pracy robicca važny ŭniosak u histaryjahrafiju historyi Biełarusi XIV—XVI stst., u vyvučeńnie historyi adnosin pamiž Vialikim Kniastvam Litoŭskim i Vialikim Kniastvam Maskoŭskim. Manahrafija Viktara Ciemušava «Na ŭschodniaj miažy Vialikaha Kniastva Litoŭskaha» stanie dobrym padmurkam dla tych, chto paźniej budzie zajmacca vyvučeńniem historyi našaj Baćkaŭščyny padčas znachodžańnia biełaruskich ziemlaŭ u składzie Vialikaha Kniastva Litoŭskaha».
X
-
U Muziei Volnaj Biełarusi pakažuć 19 aryhinalnych litahrafij Napaleona Ordy
-
Cyrulnik i piśmieńnik Siarhiej Kalenda: «Jość ludzi, jakija kažuć: «Paśla takoj knihi ja b nie pajšoŭ da vas stryhčysia»
-
Na dziaržaŭnym telebačańni prahučała «Kupalinka» — jaje vykanaŭ sierbski ijeramanach, jaki šmat hadoŭ žyvie ŭ Biełarusi
Ciapier čytajuć
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy21
Kamientary