Sud pa skarzie Łohvinava na rašeńnie Mininfarma pačniecca ŭ kancy studzienia
Słuchańni pa skarzie vydaŭca Ihara Łohvinava na rašeńnie Ministerstva infarmacyi pryznačanyja na 30 studzienia.
Takoje rašeńnie pryniataje siońnia na papiarednich słuchańniach pa spravie ŭ Viarchoŭnym sudzie.
Vydaviec spadziajecca abskardzić apošniuju z šaści admovaŭ Mininfarma ŭ vydačy pryvatnamu vydavieckamu ŭnitarnamu pradpryjemstvu «Łohvinaŭ» licenzii na raspaŭsiudžvańnie drukavanaj pradukcyi.
Vydaviectva było pazbaŭlenaje licenzii ŭ vieraśni 2013 hoda za vypusk alboma «Pres-fota Biełarusi 2011», jaki sud Ašmianskaha rajona paličyŭ ekstremisckim.
U śniežni 2014 hoda inśpiekcyja Ministerstva pa padatkach i zborach Centralnaha rajona Minska pa patrabavańni Mininfarma praviała pazapłanavuju pravierku ŭ knižnym mahazinie «ŁohvinaŬ». Pa vynikach pravierki było zajaŭlena, što mahazin zajmajecca realizacyjaj drukavanaj pradukcyi bieź licenzii Mininfarma.
9 studzienia hetaha hoda Ekanamičny sud Minska pastanaviŭ aštrafavać pryvatnaje vydavieckaje ŭnitarnaje pradpryjemstva «Łohvinaŭ» na 30 bazavych vieličyniaŭ (5,4 młn. rubloŭ) za ažyćciaŭleńnie niezakonnaj pradprymalnickaj dziejnaści, a taksama kanfiskavać dachod, atrymany jurydyčnaj asobaj u studzieni—śniežni 2014 hoda ŭ pamiery bolšym za 960 młn. rubloŭ.
Ihar Łohvinaŭ nie pryznaje siabie vinavatym. Jon miarkuje, što rabiŭ usio mahčymaje dla taho, kab nie ŭčyniać pravaparušeńni. U pryvatnaści, na praciahu 2014 hoda kiraŭnictva PVUP «Łohvinaŭ» šeść razoŭ sprabavała atrymać nieabchodnuju licenziju Mininfarma, adnak pa roznych pryčynach u vydačy takoha dakumienta čynoŭniki admaŭlali.
U kamientaryi žurnalistam vydaviec zajaviŭ, što rasceńvaje admovy Mininfarma ŭ vydačy licenzii raspaŭsiudžvalnika drukavanaj pradukcyi jak vajnu, jakaja ciahniecca ŭžo niekalki hadoŭ. «Ni ŭ adnoj krainie śvietu niama zakonaŭ, aktaŭ, jakija zabaraniali b pradavać knižki, nie kažučy ŭžo pra toje, kab drukavać ich i vydavać», — padkreśliŭ Łohvinaŭ.
20 studzienia ŭ 14.00 u knižnym mahazinie «ŁohvinaŬ» płanujecca pres-kanfierencyja Ihara Łohvinava.
Siońnia paśla papiarednich słuchańniaŭ u sudzie vydaviec skazaŭ žurnalistam: «Kali nam admoviać, ja dumaju, dalejšyja sproby atrymańnia rehistracyi niemetazhodnyja».
Ciapier čytajuć
Stała viadoma imia jašče adnaho pałkoŭnika DFR, aryštavanaha KDB. Jon raskazvaŭ sukamiernikam, jak jaho katavali11
Kamientary