Суд па скарзе Логвінава на рашэнне Мінінфарма пачнецца ў канцы студзеня
Слуханні па скарзе выдаўца Ігара Логвінава на рашэнне Міністэрства інфармацыі прызначаныя на 30 студзеня.
Такое рашэнне прынятае сёння на папярэдніх слуханнях па справе ў Вярхоўным судзе.
Выдавец спадзяецца абскардзіць апошнюю з шасці адмоваў Мінінфарма ў выдачы прыватнаму выдавецкаму ўнітарнаму прадпрыемству «Логвінаў» ліцэнзіі на распаўсюджванне друкаванай прадукцыі.
Выдавецтва было пазбаўленае ліцэнзіі ў верасні 2013 года за выпуск альбома «Прэс-фота Беларусі 2011», які суд Ашмянскага раёна палічыў экстрэмісцкім.
У снежні 2014 года інспекцыя Міністэрства па падатках і зборах Цэнтральнага раёна Мінска па патрабаванні Мінінфарма правяла пазапланавую праверку ў кніжным магазіне «ЛогвінаЎ». Па выніках праверкі было заяўлена, што магазін займаецца рэалізацыяй друкаванай прадукцыі без ліцэнзіі Мінінфарма.
9 студзеня гэтага года Эканамічны суд Мінска пастанавіў аштрафаваць прыватнае выдавецкае ўнітарнае прадпрыемства «Логвінаў» на 30 базавых велічыняў (5,4 млн. рублёў) за ажыццяўленне незаконнай прадпрымальніцкай дзейнасці, а таксама канфіскаваць даход, атрыманы юрыдычнай асобай у студзені—снежні 2014 года ў памеры большым за 960 млн. рублёў.
Ігар Логвінаў не прызнае сябе вінаватым. Ён мяркуе, што рабіў усё магчымае для таго, каб не ўчыняць правапарушэнні. У прыватнасці, на працягу 2014 года кіраўніцтва ПВУП «Логвінаў» шэсць разоў спрабавала атрымаць неабходную ліцэнзію Мінінфарма, аднак па розных прычынах у выдачы такога дакумента чыноўнікі адмаўлялі.
У каментарыі журналістам выдавец заявіў, што расцэньвае адмовы Мінінфарма ў выдачы ліцэнзіі распаўсюджвальніка друкаванай прадукцыі як вайну, якая цягнецца ўжо некалькі гадоў. «Ні ў адной краіне свету няма законаў, актаў, якія забаранялі б прадаваць кніжкі, не кажучы ўжо пра тое, каб друкаваць іх і выдаваць», — падкрэсліў Логвінаў.
20 студзеня ў 14.00 у кніжным магазіне «ЛогвінаЎ» плануецца прэс-канферэнцыя Ігара Логвінава.
Сёння пасля папярэдніх слуханняў у судзе выдавец сказаў журналістам: «Калі нам адмовяць, я думаю, далейшыя спробы атрымання рэгістрацыі немэтазгодныя».
Цяпер чытаюць
Стрыжак: Я проста гаўно, я ляжу на дне самай бруднай канавы і адтуль спрабую нешта сказаць у сваю абарону34
Каментары