Mitrapalit Kandrusievič zaklikaŭ malicca za pośpiech minskaha samita
Zvarot Mitrapalita Tadevuša Kandrusieviča ŭ suviazi ź minskaj sustrečaj pa Ukrainie.
Hłybokapavažanyja vierniki i ŭsie ludzi dobraj voli!
Usie my vielmi zaniepakojeny raźvićciom situacyi ŭ bratniaj Ukrainie, dzie nie ścichaje, ale razrastajecca zbrojny kanflikt. U vyniku čaho cierpiać i hinuć jak niepasrednyja jaho ŭdzielniki, tak i ni ŭ čym nie vinavatyja mirnyja ludzi, z dnia na dzień pavialičvajecca kolkaść biežancaŭ, razburajucca harady i vioski, niščycca ekanomika, narastaje sacyjalna-palityčnaja napružanaść i h.d.
Z kožnym dniom stanovicca ŭsio bolš jasna, što kanflikt niemahčyma vyrašyć zbrojnymi dziejańniami, jakija pahražajuć niepradkazalnymi nastupstvami, mohuć vyjści z-pad kantrolu i ŭciahnuć u jaho mnohija krainy śvietu. Adzinym šlacham jaho vyrašeńnia źjaŭlajecca dyjałoh, ab čym nie adnojčy zajaŭlaŭ taksama i Papa Francišak.
U apošnija dni źjaviłasia novaja nadzieja na dypłamatyčnaje vyrašeńnie hetaha zaciažnoha kanfliktu, ab čym śviedčać intensiŭnyja kantakty, pieramovy i zajavy suśvietnych palityčnych lidaraŭ. Učora ŭ Minsku adbyłosia pasiadžeńnie Trochbakovaj kantaktnaj hrupy pa Ukrainie. Na siońnia ŭ biełaruskaj stalicy ŭ tak zvanym narmandskim farmacie zapłanavana sustreča Prezidentaŭ Ukrainy, Rasii i Francyi, a taksama Kanclera Hiermanii z metaj vypracavać kankretnyja šlachi vyrašeńnia kanfliktu.
Simvalična, što 11 lutaha, u liturhičny ŭspamin Najśviaciejšaj Panny Maryi ź Lurda, Katalicki Kaścioł adznačaje Suśvietny dzień chvorych. Situacyja va Ukrainie paćviardžaje stan duchoŭnaj chvaroby, kali čałaviek nie žadaje žyć pavodle Božaha zakonu lubovi da bližniaha i pavahi da jaho pravoŭ.
Źviartajusia da vas, vierniki i ludzi dobraj voli: nie zastavajciesia abyjakavymi da ŭkrainskaj trahiedyi i losu našych ukrainskich bratoŭ i siaścior, maliciesia ab pośpiechu minskaj sustrečy, kab doŭhačakany mir narešcie zapanavaŭ u našych paŭdniovych susiedziaŭ, kab tam jak maha chutčej zaviaršylisia žachi zbrojnych dziejańniaŭ i ludzi mahli spakojna žyć.
Maci Božaja Lurdskaja, vyprasi ŭ svajho Syna Jezusa Chrysta łasku miru va Ukrainie.
-
Ciahnikovamu dyśpietčaru, aryštavanamu za karupcyju, dadali abvinavačańnie ŭ «zdradzie dziaržavie»
-
U Minsku pieradumali znosić chruščoŭki. Renavacyja zakranie dvuch-trochpaviarchovyja damy
-
Cichanoŭskaja abmierkavała ź ministram zamiežnych spraŭ Ukrainy detali pryznačeńnia novaha śpiecpasłańnika ŭ Biełarusi
Kamientary