U minskich kramach płanujecca adkryć stendy łatvijskich tavaraŭ, paviedamili Delfi.lv u pres-słužbie Ryžskaj dumy.
«Ryžskaje samakiravańnie akaža padtrymku ŭ ramkach svajoj kampietencyi, kab spryjać zbytu ŭ Biełarusi pradukcyi, vyrablenaj u Łatvii i Ryzie. Jość kankretny namier stvaryć u minskich kramach stendy «Ryžski kutok», dzie realizoŭvałasia b naša pradukcyja», — skazaŭ mer łatvijskaj stalicy Nił Ušakoŭ, jaki znachodzicca ź vizitam u Minsku.
Pavodle jaho słoŭ, «Ryžskija kutki» ŭ kramach biełaruskaj stalicy płanujecca arhanizavać pa ŭzory «Ryžskich panadvorkaŭ», niekali ŭdała stvoranych u mahazinach Maskvy, ale jakija ciapier zakrylisia z-za ŭzajemnych sankcyj Jeŭrasajuza i Rasii.
«U nas niama mety napramuju kankuryravać ź biełaruskimi tavarami, ale prapanoŭvać nišavyja pradukty, jakija mohuć uzbahacić mahčymaści vybaru dla pakupnikoŭ», - skazaŭ Ušakoŭ, dadaŭšy, što spadziajecca taksama i na pašyreńnie supracoŭnictva biełaruskich pradprymalnikaŭ z Ryžskim svabodnym portam.
U sieradu 8 krasavika Ušakoŭ i staršynia Minskaha harvykankama Andrej Šorac padpisali ŭ Minsku prahramu supracoŭnictva pamiž dvuma stalicami ŭ 2015-2017 hh. Dakumient praduhledžvaje supracoŭnictva ŭ sadziejničańni pradprymalnictvu i raźvićciu turyzmu, a taksama abmien vopytam u pytańniach kamunalnaj haspadarki, achovy navakolnaha asiarodździa i pomnikaŭ, sacyjalnaj palityki i achovy zdaroŭja.
Mer Ryhi taksama adkryŭ Łatvijska-biełaruski biznes-forum, pryniaŭ udzieł u cyrymonii adkryćcia ŭ Minsku mižnarodnaj vystavy «Adpačynak 2015» i naviedaŭ Minski technałahičny park.
Ryžskaja haradskaja delehacyja budzie znachodzicca ŭ Minsku z rabočym vizitam z 7 pa 10 krasavika.
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary