Były pryjomny syn Iryny Mocnaj z Klimavičaŭ, 17-hadovy Alaksandr Puhačoŭ, byŭ znojdzieny paviešanym u pakoi internata ŭ Minsku.
Infarmacyju pra śmierć paćvierdziła aficyjnaja pradstaŭnica Śledčaha kamiteta Julija Hančarova. Pavodle jaje słoŭ, junak byŭ znojdzieny 7 červienia paviešanym u pakoi internata, u jakim jon žyŭ, navučajučysia ŭ adnoj sa staličnych siarednich śpiecyjalnych navučalnych ustanoŭ.
«U chodzie pieršapačatkovych pravieračnych mierapryjemstvaŭ śledstva pryjšło da vysnovy, što heta suicyd», — paviedamiła Hančarova. U ciapierašni čas upraŭleńnie Śledčaha kamiteta Minska praciahvaje pravierku.
Jak paviedamiła žycharka Klimavickaha rajona Alena Marčanka, małady čałaviek byŭ pachavany 10 červienia ŭ rodnaj vioscy Cimanava.
Sprava pryjomnaj siamji Iryny Mocnaj nabyła vialiki hramadski rezanans u minułym hodzie, kali Klimavicki rajvykankam pazbaviŭ žančynu prava apieki nad pryjomnymi dziećmi. Heta adbyłosia paśla samahubstva jaje muža Viktara, jaki byŭ znojdzieny paviešanym 6 červienia 2014 hoda ŭ Minsku ŭ čas naviedvańnia pryjomnaj dački, jakaja tam navučajecca.
25 lipienia Mocnaja była zatrymanaja milicyjaj. Razam ź joj z užyvańniem hvałtu byŭ zatrymany jaje rodny 19-hadovy syn Vital, na jakoha nadzieli kajdanki. Pryjomnych dziaciej dastavili ŭ dziciačy dom. Žančyna nie pahadziłasia z takim rašeńniem uładaŭ, źviartałasia ŭ roznyja instancyi z prośbaj dazvolić i dalej vychoŭvać siemiarych dziaciej.
U kancy žniŭnia orhany śledstva ŭ Klimavičach raspačali spravu ŭ dačynieńni da Mocnaj pa art. 176 KK (złoŭžyvańnie pravami apiekuna abo papiačyciela). Paśla sprava papoŭniłasia jašče dvuma składami, praduhledžanymi č. 2 art. 154 (katavańnie, ździejśnienaje ŭ dačynieńni da niepaŭnaletniaha) i č. 1 art. 183 (abmiežavańnie asabistaj svabody čałavieka) KK. U śniežni 2014 sud u Klimavičach pryznaŭ byłuju pryjomnuju maci Irynu Mocnuju vinavataj u złoŭžyvańni pravami apiekuna (papiačyciela) i pryhavaryŭ da čatyroch hadoŭ pazbaŭleńnia voli. Sud prachodziŭ za začynienymi dźviaryma. 5 sakavika Mahiloŭski abłasny sud adchiliŭ skarhu Mocnaj na prysud. U 2014 hodzie Mocnaja taksama była pryznana vinavataj u administracyjnym pravaparušeńni (samaŭpraŭstvie) i aštrafavanaja na 750 tysiač rubloŭ.
Mocnaja, jakaja ciapier znachodzicca ŭ miescach źniavoleńnia, raniej zajaŭlała, što ŭsie dziejańni suprać jaje źjaŭlajucca pomstaj miascovych čynoŭnikaŭ za toje, što jana źviartałasia sa skarhami ŭ vyšejšyja instancyi. Pra heta jana paviedamiła ŭ adkrytym liście na imia Alaksandra Łukašenki.
Pryjomnaja siamja Mocnych była stvoranaja ŭ 2002 hodzie pieršaj u Klimavickim rajonie. Na praciahu dziesiaci hadoŭ jana ličyłasia adnoj z najlepšych. Paśla ŭsich pierypietyj Mocnyja źjechali ŭ inšuju vobłaść.
Ciapier čytajuć
«Lublu, kali biełarusy biełarusiacca»: u sacsietkach žartujuć z nadvorja i abmiarkoŭvajuć prablemy2
Kamientary