MAP znoŭ patrabuje ad Biełarusi vykanać usie rekamiendacyi pa pravach pracoŭnych

Mižnarodnaja arhanizacyja pracy (MAP) patrabuje ad urada Biełarusi vykanać usie astatnija rekamiendacyi kamisii pa rasśledavańni ad 2004 hoda pa palapšeńni situacyi z pravami pracoŭnych i prafsajuzaŭ.

Zroblena heta pavinna być da nastupnaj Mižnarodnaj kanfierencyi pracy (MKP) u 2016 hodzie. Takoje patrabavańnie ŭtrymlivajecca ŭ zaklučeńni kamiteta pa normach i standartach MAP, vyniesienym pa vynikach razhladu biełaruskaha pytańnia na 104-j siesii MKP, što prachodzić u Ženievie 1—13 červienia, paviedamili ŭ pres-słužbie Biełaruskaha kanhresa demakratyčnych prafsajuzaŭ.

U zaklučeńni adznačajecca, što da ŭvahi była pryniataja ŭsia infarmacyja, padadzienaja ŭradam Biełarusi, źviestki, jakija vyśvietlilisia pa chodzie dyskusii, a taksama kamientary kamiteta ekśpiertaŭ. Hetyja kamientary tyčylisia «abmiežavańnia pravoŭ pracoŭnych na svabodnuju arhanizacyju prafsajuzaŭ», pieraškod «dla realizacyi prava na praviadzieńnie mirnych demanstracyj, što vynikaje z zakanadaŭstva ab masavych mierapryjemstvach», a taksama «peŭnych zabaron na atrymańnie biazvypłatnaj zamiežnaj dapamohi».

Kamitet pa normach i standartach adznačyŭ, što biełaruski ŭrad praciahvaje kantralavać vykanańnie prapanoŭ kantaktnaj misii MAP, jakaja naviedvała Biełaruś u 2014 hodzie. Jon taksama źviarnuŭ uvahu na dekret prezidenta № 4, jaki ablehčyŭ umovy stvareńnia prafsajuznych arhanizacyj na pradpryjemstvach i ŭ arhanizacyjach.

Tym nie mienš kamitet vykazaŭ «hłybokuju zakłapočanaść nakont taho, što za dziesiać hadoŭ paśla dakłada kamisii pa rasśledavańni MAP urad Biełarusi nie zdoleŭ pryniać nieabchodnych mier dla taho, kab vykanać usie jaje rekamiendacyi». «Rabotniki praciahvajuć sutykacca sa šmatlikimi pieraškodami ŭ realizacyi prava na arhanizacyju prafsajuzaŭ pa svaim vybary, jak u zakanadaŭstvie, tak i na praktycy», — havorycca ŭ zaklučeńni.

Takim čynam, kamitet patrabuje ad urada Biełarusi vykanańnia ŭsich astatnich rekamiendacyj kamisii pa rasśledavańni ad 2004 hoda da nastupnaj Mižnarodnaj kanfierencyi pracy, a taksama pradstavić kamitetu ekśpiertaŭ spravazdaču ab rabocie, što pravodzicca ŭ hetym kirunku ŭ 2015 hodzie.

Ad biełaruskich uładaŭ taksama patrabujecca pradstavić kamitetu ekśpiertaŭ infarmacyju ab funkcyjach i roli trochbakovaha savieta pa pracoŭnych i sacyjalnych pytańniach, zabiaśpiečyć nieadkładnaje spynieńnie praktyki dyskryminacyi i pieraśledu prafsajuznych lidaraŭ i aktyvistaŭ.

Varta zaznačyć, što Biełaruś sioleta nie była ŭklučanaja ŭ śpiecyjalny parahraf MAP jak kraina, dzie hruba parušajuć pravy pracoŭnych i prafsajuzaŭ.

• 0
• 0
• 0
• 0
• 0
• 0
• 0
• 0