Pravasłaŭny śviatar z Hrodna: Vykarystańnie simvoliki RF i Ukrainy moža być pravakacyjnym
U carkoŭnym šapiku ŭ pravasłaŭnym kafiedralnym Śviata-Pakroŭskim sabory Hrodna ŭ prodažy źjaviŭsia «Malitvasłoŭ pravasłaŭnaha voina» kišennaha farmata, na vokładcy jakoha vyjaŭlenyja trykałor i hierb Rasii, a źmieščanyja ŭ malitoŭniku teksty ŭtrymlivajuć šmatlikija zakliki baranić sa zbrojaj u rukach miežy i terytoryi Rasijskaj dziaržavy.
Prodaž vydańnia vyklikaŭ abureńnie ludziej i ŚMI, jakija ličać niedapuščalnym jaho raspaŭsiud u biełaruskich chramach, pakolki Biełaruś nie źjaŭlajecca častkaj Rasii, da taho ž «Malitoŭnik» vydadzieny ŭ 2014 hodzie, kali na ŭschodzie Ukrainy ŭžo vialisia bajavyja dziejańni pamiž ukrainskimi i rasijskimi vajskovymi adzinkami, a ŭ Rasii startavała šavinistyčnaja prapahandysckaja kampanija, paviedamlaje belsat.eu.
Kamientujučy zdareńnie, nastajaciel pravasłaŭnaj Barysahlebskaj (Kałožskaj) carkvy ŭ Hrodna a. Hieorhij Roj źviartaje ŭvahu na aściarožnaść, ź jakoj Pravasłaŭnaja Carkva pavinna padychodzić da atrybutyki, jakaja, na tle kanfliktu va Ukrainie,usprymajecca dvuchsensoŭna. «Z pryčyny viadomych minułahodnich padziejaŭ dziaržaŭnaja simvolika Rasii i Ukrainy stała vielmi palityzavanaj, — kaža śviatar. — Jaje nieabdumanaje vykarystańnie ŭ Biełarusi časam moža być pravakacyjnym. Tamu, kaniečnie, supracoŭniki carkoŭnaj kramy pavinny byli b praduhledzieć heta i paźbiehnuć vystaŭleńnia ŭ prodaž malitvasłovaŭ z takim dyzajnierskim azdableńniem. Uvohule liču, što afarmleńnie malitvasłova, navat kali jon «voinski», pavinna być vyklučna z vykarystańniem chryścijanskaj simvoliki».
Adnačasova a. Hieorhij raić źviarnuć uvahu na toj fakt, što teksty malitvasłova składalisia ŭ XVIII—XIX stahodździach, padčas isnavańnia Rasiejskaj impieryi. «Akramia hetaha, my, pravasłaŭnyja biełarusy, — dadaje śviatar, — svaju biełaruskuju ziamlu taksama ličym Ruskaj ziamloj. Ale nie ŭ sensie jaje naležnaści da sučasnaj Rasiejskaj Fiederacyi, a ŭ sensie histaryčnym. Dastatkova zazirnuć u biełaruskija histaryčnyja akty XVI—XVIII stahodździaŭ, i my ŭbačym, što vybitnyja postaci našaj kultury i historyi havorać pra siabie jak pra «narod ruski», ale heta nie aznačała, što jany atajasamlivajuć siabie z Maskoŭskim kniastvam».
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary