Ciapierašni ŭzrovień zołatavalutnych reziervaŭ (ZVR) Biełarusi źjaŭlajecca tryvožnym, adznačajecca ŭ novym ahladzie centra makraekanamičnych daśledavańniaŭ rasijskaha «Śbierbanka».
«Situacyju z ułasnymi reziervami Biełarusi možna acharaktaryzavać jak tryvožnuju. Pavodle vynikaŭ červienia ahulny abjom zołatavalutnych reziervaŭ Biełarusi składaŭ 4,6 młrd. dołaraŭ, jon źmienšyŭsia na 1,8 młrd. dołaraŭ za apošnija 12 miesiacaŭ. Pry hetym reziervy ŭ zamiežnaj valucie składajuć usiaho 1,7 młrd. dołaraŭ», — kanstatujuć rasijskija analityki.
Jany źviartajuć uvahu na toje, što najbližejšym časam Biełaruś ažyćciavić značnyja vypłaty pa źniešnim doŭhu (prykładna 1 młrd. dołaraŭ). Heta «robić dalejšaje źnižeńnie ZVR całkam mahčymym».
«Va ŭmovach adsutnaści ŭstojlivaha prytoku valuty ŭ krainu (deficyt rachunku biahučych apieracyj u pieršym kvartale skłaŭ 1 młrd. dołaraŭ) Maskva zastajecca asnoŭnaj krynicaj źniešniaha finansavańnia», — adznačajecca ŭ ahladzie.
Pavodle vynikaŭ červienia 2015 hoda ZVR Biełarusi, raźličanyja zhodna ź mietadałohijaj MVF, pavialičylisia na 13,4 młn. dołaraŭ i na 1 lipienia skłali 4,62 młrd. dołaraŭ ZŠA ŭ ekvivalencie.
U nacyjanalnym vyznačeńni abjom zołatavalutnych reziervaŭ źmienšyŭsia za červień na 156,3 młn. dołaraŭ ZŠA i na 1 lipienia 2015 hoda skłaŭ 5,07 młrd. dołaraŭ ZŠA ŭ ekvivalencie.
Pavodle źviestak Nacbanka, padtrymańniu zołatavalutnych reziervaŭ u červieni spryjali pastupleńni ad źbirańnia ekspartnych pošlin na naftapradukty. Admoŭny ŭpłyŭ na ZVR zrabili pahašeńnie dziaržavaj źniešnich i ŭnutranych daŭhoŭ u zamiežnaj valucie, a taksama źmianšeńnie koštu zołata na mižnarodnym rynku kaštoŭnych mietałaŭ.
Ciapier čytajuć
Syn Siarhieja Bulby źbiraje hrošy ŭ Polščy, prydumaŭšy sabie bijahrafiju vieterana i palityčnaha ŭciekača45
Kamientary