Jašče adna kryminalnaja sprava pa vynikach mitynhu pradprymalnikaŭ 10 studzienia
Aktyvist arhanizacyi AHP »Maładyja demakraty» Michaił Kryvaŭ pryznany padazravanym pa kryminalnaj spravie ab padziejach 10 studzienia ŭ Miensku.
Jak paviedamiła BiełaPAN supracoŭnica pres‑słužby AHP Natalla Vałakida, M.Kryvaŭ byŭ vyklikany pozvaj, jakuju jamu ŭručyŭ učastkovy pozna viečaram 25 lutaha. M.Kryvaŭ źjaviŭsia ŭ śledčaje ŭpraŭleńnie, dzie jamu ab\javili ab jaho statusie padazronaha ŭ ździajśnieńni złačynstva, praduhledžanaha častkaj 1 artykuła 342 Kryminalnaha kodeksa Biełarusi (arhanizacyja i padrychtoŭka dziejańniaŭ, što hruba parušajuć hramadski paradak, abo aktyŭny ŭdzieł u ich).
«Pastanovu ab pryznańni M.Kryvava padazronym padpisaŭ načalnik adździeła SUPR HUUS Minharvykankama padpałkoŭnik Pavieł Michalkievič i ŭzhadniŭ pastanovu z načalnikam śledčaha ŭpraŭleńnia Hienadziem Kazakievičam. Adnak Michaił zajaviŭ ab tym, što dopyt moža praciahvacca tolki ŭ prysutnaści advakata, paprasiŭ vyklikać advakata Alaksandra Halijeva i čakaje jaho pryjezdu», — paviedamiła N.Vałakida.
Zhodna z KK Biełarusi, častka 1 arytkuła 342 praduhledžvaje pakarańnie ŭ vyhladzie štrafu, abo aryštu na termin da 6 miesiacaŭ, abo abmiežavańnie voli da troch hadoŭ, abo pazbaŭleńnie voli na toj ža termin.
Jak paviedamiła N.Vałakida, jašče adzin maładziožny aktyvist, člen BSDP (Hramada) Alaksandr Stralcoŭ nie zmoh 26 lutaha pryjechać u śledčaje ŭpraŭleńnie z‑za chvaroby. Jon taksama byŭ vyklikany na dopyt u jakaści padazronaha pa kryminalnaj spravie, što raspačata pavodle padziej 10 studzienia.
Nahadajem, u akcyi pratestu pradprymalnikaŭ 10 studzienia ŭziali ŭdzieł bolš za try tysiačy čałaviek, ź ich 27 byli zatrymanyja i 23 — asudžanyja. Mitynhoŭcy vystupali suprać padpunkta 1.1 ukaza prezidenta № 760 ad 29 śniežnia 2006 hoda, jaki dazvalaje IP najmać na pracu tolki blizkich svajakoŭ. U chodzie praviadzieńnia akcyi na niekatory čas byŭ pierakryty ruch na praśpiekcie Niezaležnaści. Pa fakcie «masavych biesparadkaŭ u centry Minska» była raspačata kryminalnaja sprava.
Kamientary