Z 1 žniŭnia RF abjadnała Vajenna-pavietranyja siły i Vojski pavietrana-kaśmičnaj abarony ŭ novy vid uzbrojenych sił — Pavietrana-kaśmičnyja siły, piša Interfaks-AVN.
Pra heta ŭ paniadziełak paviedamiŭ ministr abarony RF hienierał armii Siarhiej Šajhu.
«Heta dazvalaje, u pieršuju čarhu, abjadnać u adnych rukach usiu adkaznaść za farmiravańnie vajenna-techničnaj palityki pa raźvićci vojsk, jakija vyrašajuć zadačy ŭ pavietrana-kaśmičnaj śfiery, pa-druhoje, za košt bolš ščylnaj intehracyi padvysić efiektyŭnaść ich vykarystańnia, pa-treciaje, zabiaśpiečyć stabilnaje raźvićcio sistemy pavietrana-kaśmičnaj abarony krainy», — skazaŭ Šajhu.
Pierad hetym bujnyja arhanizacyjnyja źmieny ŭ rasiejskich kaśmičnych vojskach i vojskach supraćpavietranaj abarony adbyvalisia mienš za 5 hod tamu. Tady byli sfarmavanyja Vojski pavietrana-kaśmičnaj abarony na bazie Kaśmičnych vojsk (isnavali z 2001 hoda) i vojsk apieratyŭna-stratehičnaha kamandavańnia pavietrana-kaśmičnaj abarony (isnavali z 2009 pa 2011 hod).
Krynica Interfaksa-AVN u Minabarony RF ličyć, što novy vid vojsk dazvolić «kompleksna zmahacca z balistyčnymi i aeradynamičnymi celami ŭ kosmasie i pavietry».
«Heta budzie ŭsioabdymnaja sistema, jakaja dazvolić znachodzić i źniščać celi, pačynajučy z dalnich rubiažoŭ. Jaje možna razhladać jak naš adkaz kancepcyi imhniennaha hłabalnaha ŭdaru ZŠA», — skazaŭ surazmoŭnik ahienctva.
Chutki hłabalny ŭdar (Prompt Global Strike, PGS) — inicyjatyva ŭzbrojenych sił ZŠA pa stvareńni sistemy, jakaja dazvalaje nanieści niajadzierny ŭdar pa luboj kropcy Ziamli za 1 hadzinu. Zadača takoj sistemy — stvaryć mahčymaść vielmi chutkaha reahavańnia na situacyju ŭ lubym rehijonie ŭ vypadku kanfliktu.
Čakajecca, što hałoŭnym srodkam takoha ŭdaru buduć balistyčnyja rakiety ź niajadziernymi bojehałoŭkami, siarod jakich asnoŭnymi buduć hipierhukavyja — z chutkaściu bolš za 5 Machaŭ (6000 km/h).
Kamientary