Łukašenka daručyŭ pravieści dabračynnuju kampaniju pa padrychtoŭcy dziaciej ź biednych siemjaŭ da škoły
U Biełarusi budzie maksimalna šyroka praviedziena dabračynnaja kampanija pa padrychtoŭcy da škoły dziaciej z małamajomnych, šmatdzietnych siemjaŭ. Takoje daručeńnie daŭ siońnia Alaksandr Łukašenka, prymajučy z dakładam ministra adukacyi Michaiła Žuraŭkova.
Padrychtoŭka da novaha navučalnaha hoda ŭžo pačałasia. Jak było paviedamlena kiraŭniku dziaržavy, prablem z tym, kab sabrać dzicia ŭ škołu, niama, možna nabyć usio nieabchodnaje — pačynajučy ad vučebnych dapamožnikaŭ i zakančvajučy vopratkaj. Alaksandr Łukašenka adznačyŭ, što ŭ krainie ŭstalavałasia dobraja tradycyja padtrymlivać u padrychtoŭcy da škoły małamajomasnyja, šmatdzietnyja siemji.
«Treba i sioleta pra heta nie zabyvać. I ŭ hetuju kampaniju padtrymki treba ŭklučyć ŭsich — ad prezidenta da tych, chto moža dapamahčy apranuć, abuć dzietak», — padkreśliŭ kiraŭnik dziaržavy. «Kab nie było adroźnieńniaŭ, što hety ź biednaj siamji, hety z bahataj siamji. U nas dzieci ŭsie adnolkavyja. Tamu tut nam treba zrabić maksimum», — dadaŭ jon.
U suviazi z hetym Alaksandr Łukašenka daručyŭ Ministerstvu adukacyi arhanizavać pracu, «kab napružyć usio hramadstva i padrychtavać dzietak u škołu».
Pry hetym asablivuju ŭvahu, jak adznačyŭ kiraŭnik dziaržavy, nieabchodna nadać pieršakłaśnikam, jakich u hetym hodzie 106 tys. — na 1,6 tys. bolš, čym u minułym. «Heta ŭžo dobraja tendencyja. Narešcie my pieraadoleli hetuju demahrafičnuju jamu, i ŭ nas źjaŭlajecca bolš pieršakłašak», — skazaŭ jon.
Kamientary