Karatkievič adkazała na zajavu Kalakina nakont 100 tysiač podpisaŭ
Aktyvistka kampanii «Havary praŭdu» Taćciana Karatkievič u intervju BiełaPAN abvierhła zajavu staršyni Biełaruskaj partyi levych «Spraviadlivy śviet» Siarhieja Kalakina ab tym, što jaje inicyjatyŭnaja hrupa nie sabrała nieabchodnyja dla rehistracyi kandydatam u prezidenty 100 tysiač podpisaŭ.
«Kali Karatkievič praciahnie ŭdzieł u vybarach i jaje zarehistrujuć kandydatam u prezidenty, heta budzie śviedčyć, što jaje kamanda pajšła na ździełku z uładami», — zajaviŭ Kalakin 21 žniŭnia na pres-kanfierencyi ŭ Minsku. Kalakin taksama paviedamiŭ, što jaho inicyjatyŭnaja hrupa sabrała ŭsiaho 64 tysiačy podpisaŭ, u suviazi z čym vyrašyła nie zdavać podpisy ŭ terytaryjalnyja kamisii.
«Składana tłumačyć pavodziny inšaha čałavieka, — skazała Karatkievič. — My z samaha pačatku padpisnoj kampanii abmianialisia podpisami ź Siarhiejem Ivanavičam, zadekłaravali publična i niefarmalna, što my adzin adnaho pavažajem i žadajem pośpiechu».
Pavodle jaje słoŭ, i Siarhiej Kalakin, i lidar Abjadnanaj hramadzianskaj partyi Anatol Labiedźka (jaki taksama nie zmoh sabrać 100 tysiač podpisaŭ) praviali «vielmi dobryja kampanii». «Kali b jany abjadnalisia i ad aljansu «Tałaka» vyłučyli adnaho kandydata, u ich, chutčej za ŭsio, była b mahčymaść naźbirać 100 tysiač podpisaŭ», — ličyć pretendent na pasadu prezidenta.
Karatkievič adznačyła, što jość niekalki faktaraŭ, jakija zabiaśpiečyli paśpiachovy zbor podpisaŭ jaje inicyjatyŭnaj hrupaj. «Pa-pieršaje, my pačali pracavać razam unutry demakratyčnaj supolnaści čatyrma arhanizacyjami za dva hady da vybaraŭ. Tyja idei, ź jakimi my idziom, siońnia prymajucca hramadzianami ŭ hramadstvie. Pa-druhoje, u nas samaja vialikaja inicyjatyŭnaja hrupa z usich demakratyčnych kandydataŭ. U jaje ŭvajšli pradstaŭniki kampanii «Havary praŭdu», Partyi BNF, Biełaruskaj sacyjał-demakratyčnaj partyi (Hramada), a taksama asobnyja aktyvisty Abjadnanaj hramadzianskaj partyi, ruchu «Za Svabodu», Biełaruskaj partyi levych «Spraviadlivy śviet». Jašče adzin faktar — heta novyja ludzi. Prykładna 300 čałaviek pryjšło praź internet i sacyjalnyja sietki, i jany byli adnymi z samych aktyŭnych», — rastłumačyła palityk.
«I samaje hałoŭnaje, u mianie siońnia dahavor ź ludźmi, jakija prychodziać na pikiety, sustrakajucca sa mnoj śpiecyjalna, sočać pa sacyjalnych sietkach, pierazvońvajucca, niasuć pazityŭ, staviać podpisy i spadziajucca, što 11 kastryčnika ŭ ich na vybarach budzie alternatyva», — padkreśliła Taćciana Karatkievič.
Zbor podpisaŭ za vyłučeńnie kandydataŭ zaviaršajecca siońnia, 21 žniŭnia. Da 19.00 sabranyja podpisy pavinny być zdadzienyja ŭ terytaryjalnyja vybarčyja kamisii.
Piatyja vybary prezidenta Biełarusi projduć 11 kastryčnika.
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary