Za kiłamietr ad Navahradka, pablizu vioski Hrabniki, zakładvajecca padmurak pieršaha ŭ krainie vietraparku, piša «Savieckaja Biełaruś».
Jašče ŭ 2011 hodzie ŭ Navahradku była zbudavanaja vietraenierhietyčnaja ŭstanoŭka. Jaje mahutnaść skłała 1,5 MVt — dahetul anałahaŭ joj u Biełarusi nie było. Śpiecyjalisty staranna nazirali i analizavali pracu vietraka. I pryjšli da vysnovy: enierhazachavalny prajekt całkam apraŭdaŭ i akupiŭ siabie.
Bolš za toje, jon daŭ enierhii na 20% bolš, čym raźličvali spačatku. Tamu ŭ adpaviednaści ź Dziaržprahramaj inavacyjnaha raźvićcia na 2011—2015 hady i było pryniata rašeńnie ab budaŭnictvie pieršaha vietraparku.
«Heta sumiesny biełaruska-kitajski prajekt, — raspavioŭ hałoŭny inžynier Lidskich elektryčnych sietak pradpryjemstva «Hrodnaenierha» Viktar Saroka. — Našy daŭnija dziełavyja partniory nie tolki dastaviać nieabchodnaje abstalavańnie z Šanchaja i akažuć dapamohu ŭ jaho mantažy, ale i praviaduć navučańnie piersanału. Dla absłuhoŭvańnia vietraparku źjavicca 10 novych pracoŭnych miescaŭ. A pakul što my pravodzim bietanavańnie padmurkaŭ. Darečy, adna kanstrukcyja važyć 200 ton (usiaho ich budzie piać). Dla taho kab nadziejna jaje zafiksavać, spatrebicca kala 500 ton bietonu i kala 40 ton stalnoj armatury. I kali ciapier my vymušany «pierahaniać» darahuju elektraenierhiju z Novałukomla, Biełaaziorska i navat Smalenska, to paśla uviadzieńnia u ekspłuatacyju vietraenierhietyčnaha parku enierhazaležnaść rajona budzie pamienšanaja ŭ niekalki razoŭ».
Płanujecca, što ŭstanoŭku abstalavańnia zavieršać u mai 2016 hoda.
Vyšynia adnoj vietraenierhietyčnaj ustanoŭki — 80—88 mietraŭ, a razmach jaje kryłaŭ dasiahaje 45 mietraŭ. Na svaju naminalnuju mahutnaść jana vychodzić pry chutkaści vietru 10 m/s, a jaje łopaści pačynajuć krucicca pry 3 m/s. U vypadku ž pieravyšeńnia normy paryvistaha vietru ŭstanoŭka tut ža składzie łopaści i spynicca. Dla hetaha dastatkova troch siekund.
Kamientary