Libieralna-demakratyčnaja partyja Respubliki Biełaruś, čyj lidar Siarhiej Hajdukievič pretenduje na pasadu prezidenta, zaklikaje dziaržorhany našaj krainy «abjadnać Uschod i Zachad». Ab hetym Hajdukievič zajaviŭ 25 vieraśnia padčas svajho druhoha televystupleńnia na kanale «Biełaruś-1».
«Libieralna-demakratyčnaja partyja Biełarusi prapanoŭvaje ŭsim palityčnym subjektam, parłamientu i ŭradu nieadkładna pastavić u paradak dnia, moža być, vielmi ambicyjnuju zadaču, ale treba heta skazać: «Abjadnać Uschod i Zachad». Naša kraina moža i pavinna być mocnym i nadziejnym mostam pamiž Zachadam i Uschodam, Poŭdniem i Poŭnačču, u nas pryvabnaje hieahrafičnaje stanovišča», — zajaviŭ kandydat.
Jon nazvaŭ takoje abjadnańnie «histaryčnaj zadačaj». «Treba vybudoŭvać ekanamičny sajuz pamiž ES i Jeŭrazijskim ekanamičnym sajuzam. My pavinny pryjści da stvareńnia adzinaj ekanamičnaj prastory, chaj heta budzie ad Lisabona da Uładzivastoka», — skazaŭ Hajdukievič.
Pavodle jaho mierkavańnia, trahičnyja padziei «ŭ brackaj nam Ukrainie pakazali, što biez kampramisu i dyjałohu niemahčyma stvaralnaje raźvićcio suśvietnych pracesaŭ». «Biełarusi nie varta niejak nieabdumana padskokvać na hieapalityčnych arelach, treba svoječasova i pravilna, moža być, padstroicca pad chod hłabalnaj i rehijanalnaj intehracyi. U słovie «padstrojvacca» niama ničoha haniebnaha, heta prahmatyčny padychod, inakš nijak», — zajaviŭ kandydat u prezidenty.
Jon padkreśliŭ, što ŭ abmierkavańni ŭkrainskaj temy Libieralna-demakratyčnaja partyja «nie arhanizavała tancy na kaściach i nie radavałasia tamu, što adbyvajecca ŭ susiedniaj krainie». «Minskija pieramovy, ja liču, — heta vielizarny pośpiech. Biełaruś pakazała siabie nadziejnaj placoŭkaj, dzie možna vyrašać, zdavałasia b, nievyrašalnyja prablemy», — adznačyŭ kandydat.
«Nielha dzialić Jeŭropu pa Biełarusi, bo my nieadjemnaja častka ŭsioj jeŭrapiejskaj cyvilizacyi. Razam z tym z Rasijaj u nas zaŭsiody było bolš adnosin. Tak histaryčna składalisia partniorskija suviazi, heta naša historyja. Navat u časy Vialikaha Kniastva Litoŭskaha i Rečy Paspalitaj ekanamična-kulturnyja adnosiny nie pieraryvalisia», — zajaviŭ Hajdukievič. Kandydat ličyć, što «naohuł, chopić dzialić historyju na drennuju i dobruju, chopić dzialić biełarusaŭ na pravilnych i niapravilnych, heta naša historyja, i my pavinny canić jaje ŭsiu, my pavinny pavažać histaryčnyja padziei, jakija adbylisia z narodam, ź Biełaruśsiu».
Pry hetym «tolki durni mohuć havaryć ab razryvie adnosin z Rasijaj», ale «lubyja intehracyjnyja ŭtvareńni, u tym liku i z Rasijaj, pavinny być tolki raŭnapraŭnymi, uzajemavyhadnymi», upeŭnieny pretendent na vyšejšuju pasadu.
«My zaŭsiody havaryli, što čynoŭniki pavinny bolš nastojliva i paśladoŭna adstojvać biełaruskuju cikavaść va ŭsich intehracyjnych utvareńniach, u tym liku i ŭ Jeŭrazijskim ekanamičnym sajuzie», — zaklučyŭ Hajdukievič.
Ciapier čytajuć
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach3
Kamientary