Prezydent ZŠA vystupiŭ z hetaj zajavaj na treci dzień rasiejskich pavietranych udaraŭ u Syryi.
Padčas pres-bryfinhu 2 kastryčnika ŭ Biełym domie prezydent ZŠA Barak Abama nazvaŭ «receptam katastrofy» pavietranuju kampaniju Rasiei ŭ Syryi, raspačatuju try dni tamu.
Pavodle prezydenta Abamy, metaj rasiejskaj aperacyi ŭ Syryi źjaŭlajecca vajennaja padtrymka režymu Bašara Asada, i hetaje rašeńnie Maskvy budzie kontrapraduktyŭnym.
«Spadar Pucin byŭ vymušany pajści ŭ Syryju nie tamu, što jon adčuvaŭ za saboj siłu, a z-za słabaści, tamu što jaho klijent, spadar Asad, razvalvaŭsia», — zajaviŭ prezydent Abama. «U pucinskuju kaalicyju ŭ dadzieny momant uvachodziać Iran i Syryja, u toj čas, jak uvieś astatni śviet źjaŭlajecca siabram našaj kaalicyi. Ja nia dumaju, što jaho ciapierašniaja stratehija ŭviadzie ludziej u zman», — dadaŭ jon. Prezydent Abama abvinavaciŭ Maskvu ŭ tym, što padčas jaje trochdzionnaj pavietranaj kampanii abjektam napadaŭ stali pazycyi bajevikoŭ, jakija naležać da ŭmieranaj apazycyi, a nie hrupoŭki «isłamskaja dziaržava». «Z punktu hledžańnia Rasiei jany ŭsie terarysty, i heta recept katastrofy», — papiaredziŭ prezydent.
Barak Abama paviedamiŭ, što amerykanskija pradstaŭniki viaduć z rasiejskim kiraŭnictvam razmovy ab źnižeńni ŭzroŭniu kanfliktu, kab sprava nie dajšła da sutyknieńniaŭ u pavietry rasiejskich samalotaŭ i samalotaŭ kaalicyi.
U adkaz na pytańni žurnalistaŭ prezydent Abama padkreśliŭ, što nia varta rabić zdahadak ab mahčymaści padtrymki Złučanymi Štatami apazycyjnych sił, jakija stali abjektam rasiejskich napadaŭ. «My nie źbirajemsia pieratvarać syryjski kanflikt u vajnu čužymi rukami pamiž Rasiejaj i ZŠA. My viadziem vajnu ź IDIŁ», — zajaviŭ Barak Abama. Pavodle słoŭ Abamy, «dziejańni spadara Pucina byli paśpiachovyja tolki ŭ adnym — u pavyšeńni jaho rejtynhaŭ ŭnutry Rasiei. Jany nie źjaŭlajucca mudrym stratehičnym chodam».
Abama taksama pryznaŭ, što amerykanskaja prahrama pa padrychtoŭcy i asnaščeńni ŭmieranych apazycyjnych sił u Syryi nie spracavała tak, jak pavinna była. Jon skazaŭ, što Vašynhton supracoŭničaje z Ankaroj, kab dapamahčy ŭmacavać paŭdniovuju miažu Tureččyny z Syryjaj, a taksama dapamahčy kurdzkim bajcam na ŭschodzie Syryi.
Kamientary