Ekśpierty: RF ničoha nie źmienić u Siryi biez naziemnaj apieracyi
Prezident Rasii Uładzimir Pucin zajaŭlaŭ, što nie adpravić u Siryju rasijskija naziemnyja vojski, adnak heta značyć, što Maskva nijak pryncypova nie źmienić situacyju ŭ hetaj krainie, piša washingtonpost.com.
Vieści čysta avijacyjnuju vajnu rasijskaja armija nie pryvykła, adznačajuć ekśpierty. Z hetaj pryčyny navat takija apieracyi niasuć pahrozu žyćciam rasijskich piłotaŭ.
«U pryncypie my ŭ hetaj śfiery pačatkoŭcy. A kali ty pačatkoviec, to buduć pamyłki. Vidavočna, jość ryzyka strataŭ», — adznačyŭ Rusłan Puchaŭ, dyrektar maskoŭskaha Centra analizu stratehij i technałohij.
Zhodna ź infarmacyjaj amierykanskich aficyjnych krynic, Maskva nakiravała ŭ Siryju pa 12 bambardyroŭščykaŭ Su-24 i Su-25, 4 źniščalniki-bambardyroŭščyki Su-34, 4 źniščalniki Su-30, a taksama 12 ci bolej viertalotaŭ Mi-24.
Imavierna, pryčynaj aktyŭnaha ŭdzieła RF u hramadzianskaj vajnie ŭ Siryi stali letnija parazy vojskaŭ prezidenta Siryi Bašara Asada.
Adnak, choć i z novaj pavietranaj padtrymkaj, naŭrad ci asadaŭskija vojski zmohuć stratehična pieraviarnuć situacyju na svaju karyść.
Usio, što budzie vychodzić za miežy taktyčnych pośpiechaŭ, budzie patrabavać vialikaha ŭdziełu naziemnych vojsk i doŭhaha płanavańnia, adznačyŭ ekśpiert pa abaronnych spravach na Bližnim Uschodzie maskoŭskaha Instytuta miravoj ekanomiki i mižnarodnych adnosin Uładzimir Jaŭsiejeŭ.
«Rasija nie moža viarnuć [Asadu] usiu Siryju», — skazaŭ jon.
Raniej kiraŭnik kamiteta pa mižnarodnych spravach Dziaržaŭnaj Dumy RF Alaksiej Puškoŭ skazaŭ, što rasijskaja apieracyja ŭ Siryi płanujecca tolki na 3-4 miesiacy.
Da taho ž paŭstancy i bajeviki lubych hatunkaŭ mohuć atrymać pieranosnyja supraćpavietranyja rakietnyja kompleksy, što zaŭvažna pavysić niebiaśpieku palotaŭ i abmiažuje mahčymaści vykarystańnia viertalotaŭ i nizkavysotnych samalotaŭ, kaža staršy śpiecyjalist analityčnaj arhanizacyi Small Arms Survey Met Šroder.
Padčas apošnich nalotaŭ u Siryi rasijskaja avijacyja rehularna vykarystoŭvaje staryja niekiravanyja bomby, što źnižaje trapnaść bambiožak.
«Heta pavialičyć kolkaść achviar siarod mirnaha nasielnictva, źnižajučy efiektyŭnaść [rasijskaj] interviencyi», — skazaŭ Dźmitry Horenburh, staršy analityk Center for Naval Analyses, analityčnaj arhanizacyi, jakaja pracuje ŭ intaresach Marskoj piachoty i Vajennaha Fłotu ZŠA.
Kamientary