Litoŭskija pamiežniki zatrymali siemiarych studentaŭ, jakija paŭźli i kacilisia ź Biełarusi ŭ bok miažy VIDEA
U niadzielu ŭdzień pamiežniki ŭ Varenskim rajonie blizu Hrodna praź sistemu videanazirańnia zafiksavali 7 nielehalnych mihrantaŭ.
U Čapkielskim bałotnym masivie pobač ź miažoj ź Biełaruśsiu z-za niestabilnaha hruntu i pryrodnych pieraškod niemahčyma było ŭstalavać kancercinu i achoŭny płot. Tamu miažu ŭ hetym miescy pamiežniki achoŭvajuć inšymi sposabami. Adzin ź ich — sistema nazirańnia, u pole zroku jakoj traplaje kožny, chto zmoža dabracca da hetaha miesca praz bałota, paviedamlaje Pamiežnaja słužba.
Z terytoryi Biełarusi 7 mihrantaŭ pierasiakli miažu paŭzkom i kacilisia adzin za adnym pa ziamli. Jany ličyli, što tak nie buduć zaŭvažanyja pamiežnikami i nie trapiać u kamiery.
Adnak jak tolki jany pierajšli miažu i apynulisia ŭ Litvie, u zaraśnikach u vilhotnym miescy bałota ich adrazu zatrymali supracoŭniki Dziaržaŭnaj pamiežnaj słužby.
Šaściora parušalnikaŭ nazvalisia hramadzianami Hambii, adzin — Maŭrytanii. Jany źbivalisia ŭ tłumačeńniach i niepaśladoŭna śćviardžali, što źjaŭlajucca studentami, jakija nibyta vučacca ŭ navučalnych ustanovach Biełarusi.
Nivodny z hetych darosłych mužčyn nie mieŭ dakumientaŭ. Častaja praktyka siarod takich asob — pazbaŭlacca dakumientaŭ jašče na biełaruskaj terytoryi, kab pry zatrymańni ŭ Litvie było ciažej vyśvietlić ich asobu i kab jany mahli davać iłžyvyja źviestki.
Pamiežnaja słužba zaznačaje, što jany adpaviadajuć typovamu partretu nielehalnaha mihranta, jaki ciapier sprabuje prarvacca ź Biełarusi ŭ Litvu: mužčyna va ŭzroście kala 20—40 hadoŭ, fizična mocny, zdarovy. Jon nie šukaje dapamohi, Litva ci prytułak u joj jaho nie cikavić, meta — nielehalna trapić dalej na Zachad, najčaściej — u Hiermaniju.
Supracoŭniki Dziaržaŭnaj pamiežnaj słužby praviali z zatrymanymi zvyčajnyja dla takich vypadkaŭ pracedury. Hetym razam patreby ŭ miedycynskaj dapamozie nie było — usie mihranty adčuvali siabie dobra i byli padrychtavanyja da sproby praniknieńnia.
Pamiežniki taksama acanili vopratku i abutak zatrymanych, ci patrebna ich zamianić. Padraździaleńni Dziaržaŭnaj pamiežnaj słužby majuć zapas takich rečaŭ i mohuć, kali treba, pieraapranuć i pieraabuć tych, kaho viartajuć.
Paśla indyvidualnaj acenki i pierakanańnia, što zamiežnikam, jakija paŭźli ŭ Litvu, ničoha nie pahražaje, było pryniata rašeńnie nie ŭpuskać ich u krainu ŭ adpaviednaści z zakanadaŭstvam. Heta było zroblena ŭ toj ža dzień — u niadzielu.
Pierad hetym usim zamiežnikam litoŭskija pamiežniki prapanavali humanitarnyja pakiety ź ježaj i inšymi rečami, prydatnymi dla znachodžańnia na adkrytym pavietry. Paŭzuny ad ich admovilisia.
Kamientary