Hierasimienia: Staražytny simvał našaj ziamli «Pahonia» siońnia aktualny jak nikoli
U intervju «Narodnaj voli» čempijonka śvietu i siarebranaja pryziorka Alimpijady-2012, płyŭčycha Alaksandra Hierasimienia paćvierdziła svaju prychilnaść nacyjanalnaj simvolicy.

«Mnie zdajecca, što staražytny simvał našaj ziamli — Vialikaha Kniastva Litoŭskaha — «Pahonia» aktualny siońnia, jak nikoli. Kaliści vieršniki VKŁ dahaniali zachopnikaŭ, jakija ŭryvalisia i rabavali našu ziamlu. Ciapier nam taksama treba dahaniać — dziakuj Bohu, nie dla ŭzbrojenaj sutyčki, a dla taho, kab adčuvać siabie roŭnymi siarod mocnych.
Nam jość čamu vučycca, i heta abaviazkova treba rabić, tamu što raście tolki toj, chto ŭmieje mianiacca.
Tut lohka pravieści paralel ź vialikim sportam: kali chočaš zmahacca za zołata čempijanataŭ śvietu, to treba być u kursie sučasnych mižnarodnych mietodyk, nie bajučysia admaŭlacca ad taho, što kaliści było dobrym i pieradavym.
Ja lublu movu, jak i ŭsie narmalnyja biełarusy. Ale ŭ realnym žyćci karystajusia joj redka. I, skažam, u našaj zbornaj nichto na joj nie razmaŭlaje. A ja nie nastolki fanatyčny pravadnik biełaruskaj movy, kab kamunikavać na joj 24 hadziny ŭ sutki. Choć ŭpeŭnienaja, što rodnuju movu pavinien viedać kožny z nas. I kožny sam vyrašaje, jakim čynam pavinien jaje pavažać.
Ja, naprykład, lublu čytać knihi na biełaruskaj. Mnie ich časta dorać. Adnu — tom z vydańnia Bykava, paprasiła niejak u Hienadzia Mikałajeviča Buraŭkina ŭ našu apošniuju ź im sustreču. Viarnuć, zrazumieła, užo nie zmahła i tamu pakinuła jaje jak pamiać pra hetaha cudoŭnaha čałavieka.
Pamiataju, my niejak pryjšli ŭ hości da siamji Buraŭkinych i ŭvieś viečar razmaŭlali pa-biełarusku — spačatku było ciažkavata, ale potym uciahnulisia. Heta była nie tolki vydatnaja praktyka, ale i čaroŭny viečar, jaki nikoli nie zabudu. Hienadź Mikałajevič i jaho cudoŭnaja žonka Julija byli vielmi dobra znajomyja z elitaj biełaruskaha hramadstva, najlepšymi pradstaŭnikami kultury — Mašeravym, Bykavym, Baradulinym… Siadziš, słuchaješ ich historyi i apaviadańni i łoviš siabie na dumcy: jak ža mała ja viedaju pra hetu ziamlu, choć nibyta i prachodziła historyju Biełarusi ŭ škole.
Mienavita ad sustreč z takimi ludźmi zaradžaješsia luboŭju da historyi rodnaj ziamli i ludziej, jakija jaje zasialali, žyli, budavali, stvarali», — raspaviała Hierasimienia.
Kamientary