Alijeŭ paraiŭ Ukrainie nie zhadžacca na akupacyju. Z-kanały zaklikajuć rychtavacca da vajny z Azierbajdžanam
«Azierbajdžan adkryta i publična zaniaŭ rusafobskuju pazicyju. I čym raniej my pačniom rychtavacca da hetaha kanfliktu, tym lepš», — u šalenstvie pravajenny kanał WarGonzo.
Prezident Azierbajdžana Ilcham Alijeŭ 19 lipienia vystupaŭ na miedyjaforumie ŭ azierbajdžanskim horadzie Šuša. Tam jamu zadaŭ pytańnie ŭkrainski błohier Dźmitryj Hardon: što b jon moh paraić Ukrainie i ŭkraincam?
Alijeŭ zaŭvažyŭ, što niekalki hadoŭ tamu adkazvaŭ na takoje pytańnie i jaho adkaz zastajecca takim ža.
«Nikoli nie pahadžacca na akupacyju. Heta hałoŭnaja parada».
Jon pryvioŭ paralel z Nahornym Karabacham.
«Za hady pieramoŭnaha pracesu, a ja ŭdzielničaŭ u im z kanca 2003 hoda, za 17 hadoŭ, było vielmi šmat prapanoŭ, vielmi šmat sustreč. Było vielmi šmat miesiedžaŭ, što treba źmirycca z realijami».
Alijeŭ taksama zajaviŭ na forumie, što jany rychtujuć dakumienty dla padačy ŭ mižnarodnyja sudy nakont avijakatastrofy z azierbajdžanskim pasažyrskim samalotam u śniežni 2024 hoda. Samalot tady lacieŭ u Hrozny, ale raźbiŭsia ŭ Kazachstanie. Ułady Azierbajdžana ličać, što jaho padbiła rasijskaja SPA.
Šerah z-kanałaŭ paśla zajaŭ Alijeva napisali pra nieabchodnaść padrychtoŭki da mahčymaj vajny z Azierbajdžanam, źviartaje ŭvahu «Ahientstvo». Pravajenny błohier Alaksiej Žyvaŭ acaniŭ vykazvańni prezidenta Azierbajdžana jak «adkryta varožyja» i napisaŭ, što «Kaśpij moža nieŭzabavie stać jašče adnym teatram vajennych dziejańniaŭ».
Kanał «Zapiski Vietierana» napisaŭ, što «Baku imkliva pieratvarajecca ŭ filijał NATA i śviadoma idzie pa śladach Ukrainy».
«Niepaźbiežnym» kanflikt z Baku nazvaŭ z-błohier Siamion Piehaŭ (kanał WarGonzo). «Azierbajdžan adkryta i publična zaniaŭ rusafobskuju pazicyju. I čym raniej my pačniom rychtavacca da hetaha kanfliktu, tym lepš», — napisaŭ Piehaŭ.
Pa słovach z-błohiera Juryja Padalaki, Alijeŭ «pryniaŭ liniju na eskałacyju» i «tolki pakazanaja jamu siła moža prymusić jaho ź jaje źviarnuć». «Dziaržava Azierbajdžan dla Rasii na siońnia nie tolki nie družalubnaja kraina, ale i hieapalityčny praciŭnik», — napisaŭ Padalaka. Pravajenny błohier zaklikaŭ MZS Rasii «adychodzić u bok i dać dla pačatku karty ŭ ruki našamu MUS, a potym, kali spatrebicca, i Ministerstvu abarony».
Kryzis u adnosinach Rasii i Azierbajdžana znoŭ abvastryŭsia paśla hibieli dvuch uradžencaŭ Azierbajdžana padčas rejdu siłavikoŭ u Jekaciarynburhu 27 červienia. Jašče vosiem čałaviek paźniej byli aryštavanyja.
Zatrymanych u Azierbajdžanie supracoŭnikaŭ «Sputnika» adpuścili pad padpisku ab niavyjeździe
U Azierbajdžanie vyrašyli zakryvać ruskamoŭnyja škoły
U Azierbajdžanie pakazali, jak vyhladajuć zatrymanyja rasijanie. Jany mocna źbityja FOTY
Čamu znoŭ sapsavalisia adnosiny pamiž Rasijaj i Azierbajdžanam. Źjaŭlajucca detali spravy
Ciapier čytajuć
«Škada, što ludzi mianie ličać takim idyjotam». Dziadok raskazaŭ, jak jaho zmahli vysačyć paśla piaci miesiacaŭ padpolla4
Kamientary