Viadoŭcy «Tancujuć usie» na ŭkrainskim telekanale STB burna adreahavali na movu kankursantki Natałki Biełazioravaj. Mnohim zdałosia, što svaimi pavodzinami jany abrazili i kankursantku, i samu biełaruskuju movu.
Videa kastynhu było apublikavanaje jašče 25 vieraśnia, ale reakcyja na jaho dasiahnuła piku ŭ siaredzinie kastryčnika.
«Što pra siabie raskazać… Vučusia, tanču, pišu vieršy. Tancy — hałoŭnaje, prafesijnaje, možna skazać, chobi», — pačała raspaviadać pra siabie Natałka Biełaziorava, studenta ź Mienska, na kastynhu na šoŭ «Tancujuć usie» ŭ Kijevie.
Try ŭkrainskija viadoŭcy raspłylisia va ŭśmieškach. Adzin ź viadoŭcaŭ pačaŭ razmaŭlać ź dziaŭčynaj pa-rasiejsku, dy taja skazała, što jana razumieje i pa-ŭkrainsku. Padčas taho, jak jana raspaviadała pra siabie, viadoŭcy nia strymlivali śmiechu, rahatali ŭhołas.
«Tak fajno cie zvučiť», — adreahavaŭ adzin viadoŭca, jaki nadalej razmaŭlaŭ z kankursantkaj pa-ŭkrainsku.
«Hospadi, ja ničieho nie ponimaju! Pie-ra-da-ča?» — reahavali rasiejskamoŭnyja viadoŭcy.
Paśla niadoŭhaj razmovy ź viadoŭcami Natałka vykanała biełaruski narodny taniec «Mituś». Viadoŭcy zastalisia niezadavolenymi jejnym vystupam: maŭlaŭ, padrychtoŭki małavata dla šoŭ. Ale adznačyli: pryjemna było, što da ich narešcie dajechaŭ biełaruski kalaryt, a biełaruskaja mova była dla ich adkryćciom.
Va ŭkrainskim internecie reakcyju viadoŭcaŭ na biełaruskuju movu mnohija ŭspryniali jak abrazu, zaklikali ŭ tym liku prynieści prabačeńni dziaŭčynie ad imia telekanału. Natałcy vykazvajuć spačuvańni ŭ kamentarach pad navinami, videa na Youtube i na jaje asabistaj staroncy na Facebook. Ale niekatoryja adznačajuć, što jana praciahnuła razmaŭlać na svajoj movie ŭ inšaj krainie navat tady, kali joj skazali, što nie razumiejuć jaje.
«…Na sudździaŭ nie kryŭduju, bo ja viedaju, što sapraŭdnyja ŭkraincy majuć honar, i heta vy jašče raz paćvierdzili svajoj padtrymkaj! Dziakuj vam! Słava Ukrainie!» — piša sama Natałka ŭ adkaz na padtrymku.
Kamientary