U sacyjalnych sietkach raspačałasia akcyja salidarnaści z kadetami #PahoniaPobač FOTY
U Biełarusi adbyvajecca šmat dziŭnaha, što ŭvachodzić u supiarečnaść z zakonami i navat zdarovym sensam. Siarod takich dzivosaŭ — situacyi vakoł nacyjanalnaha simvała «Pahonia». Hierb zaniesieny ŭ śpis historyka-kulturnych kaštoŭnaściaŭ, a za šalik z «Pahoniaj» na futbole dajuć štrafy. «Pahonia» jość na hierbach haradoŭ i abłaściej Biełarusi, a chłopcaŭ, jakija nadzieli ź joju cišotki, vyhaniajuć sa škoły.
A miž tym pra «Pahoniu» pisaŭ vieršy kłasik biełaruskaj litaratury Maksim Bahdanovič. Pra «Pahoniu» śpiavaŭ Uładzimir Mulavin z ansamblem «Pieśniary», a Alaksandr Łukašenka kłaŭ ruku na kanstytucyju Biełarusi z «Pahoniaj», kali prymaŭ pieršy raz prysiahu na pasadu prezidenta.
«Pahonia» — heta nacyjanalny hierb Biełarusi, upieršyniu zafiksavany ŭ histaryčnych krynicach u 1291 hodzie. Miž tym zafiksavanyja šmatlikija vypadki, kali za publičnaje vykarystańnie nacyjanalnych simvałaŭ biełarusy stanoviacca achviarami niezakonnych dziejańniaŭ dziaržaŭnych struktur. Takoje ŭražańnie, što Biełaruś — kraina akupavanaja, dzie čyjeści tajemnyja zahady značać bolš, čym nacyjanalnyja zakony i kanstytucyja.
U suviazi z hetym moładzievaja supołka «Art-siadziba» raspačała kampaniju salidarnaści «Pahonia pobač — budziem žyć».
Junaki zaklikali publikavać u sacyjalnych sietkach ułasnyja fota z «Pahoniaj» z chešteham #PahoniaPobač.
Taksama junaki zaklikajuć samastojna raspaŭsiudžvać «Pahoniu» ŭ vyhladzie nalepak, mahnitaŭ, značkaŭ, branzaletaŭ, cišotak i lubych inšych rečaŭ.
«Art-siadziba» admysłova sabrała 14 varyjantaŭ hierba ŭ viektarnym i rastravym farmatach dla vašaj tvorčaści i samastojnaha stvareńnia roznaj pradukcyi dla raspaŭsiudu, jakija volna možna spampavać tut.
Kali vy chočacie finansava padtrymać kampaniju #PahoniaPobač, kab vypuścić nalepki akcyi z «Pahoniaj» dla biaspłatnaha raspaŭsiudu ich pa Biełarusi, to źviartajciesia da na e-mail: [email protected] albo prychodźcie ŭ ofis. «Art-siadziba» abiacaje zabiaśpiečyć chutki vyrab i raspaŭsiud nalepak salidarnaści z «Pahoniaj» pa ŭsioj Biełarusi.
I pamiatajcie, što «Pahonia» — histaryčnaja kaštoŭnaść Biełaruskaha naroda! — zaklikajuć artsiadzibaŭcy.
Hałoŭnaja zadača akcyi adna — kab luby pieraśled za vykarystańnie «Pahoni» spyniŭsia, a da biełarusaŭ pierastali stavicca jak da padniavolnaha naroda.
Kamientary