Połackija IP adnavili rabotu i źbirajuć podpisy pad zvarotam da kiraŭnictva rajvykankama

Indyvidualnyja pradprymalniki (IP) Połackaha rynku 18 kastryčnika adnavili pracu. Paralelna idzie zbor podpisaŭ pad kalektyŭnym zvarotam da staršyni Połackaha rajvykankama Mikałaja Šaŭčuka. 

Svoj zvarot da kiraŭnika miascovaj ułady pradprymalniki tłumačać «vostraj i napružanaj situacyjaj na rynkach i handlovych abjektach horada». «Heta moža pasłužyć padstavaj dla taho, što padobnyja chvalavańni mohuć uźniknuć u inšych rehijonach krainy i ź inšymi maštabami, heta značyć stać pieradumovaj dla sacyjalnaha vybuchu», — havorycca ŭ zvarocie. 

Pradprymalniki pišuć, što nie mohuć narmalna pracavać, bo «apasajucca za svoj tavar, jaki mohuć kanfiskavać». «Heta zdaryłasia z-za pravierak nakładnych asobnych IP, vynikam jakich stała kanfiskacyja tavaraŭ», — adznačajecca ŭ zvarocie.

IP nahadvajuć kiraŭniku rajvykankama, što viasnoj Administracyja prezidenta daručyła stvaryć u Biełarusi alternatyŭnyja rasijskim aptovyja bazy z anałahičnym asartymientam, canoj i dakumientami. Na siońnia hetaje daručeńnie nie vykananaje. «Aptovych baz, padobnych rasijskim, jak nie było, tak i niama. I mienavita heta nie daje maralnaha prava kantrolnym orhanam pazbaŭlać hramadzian svajoj krainy pracy i niedarahich tavaraŭ», — ličać IP. 

Jany śćviardžajuć, što z metaj vykanańnia ŭkaza prezidenta № 222 ab rehulavańni pradprymalnickaj dziejnaści i realizacyi tavaraŭ IP sprabavali znajści pastaŭščykoŭ z supravadžalnymi dakumientami, adnak na momant nabyćcia tavaraŭ na aptovych rynkach Rasii nie mahli vyznačyć sapraŭdnaść nakładnych firm pastaŭščykoŭ. 

Pradprymalniki źviartajuć uvahu na toje, što hetyja dakumienty prymalisia padatkovymi orhanami dla naličeńniaŭ i dalejšaj vypłaty IP 20% staŭki PDK. «Tamu ŭsie spraviadliva mieli poŭnuju ŭpeŭnienaść, što pradprymalniki dziejničajuć u miežach zakanadaŭstva», — padkreślivajecca ŭ zvarocie. 

Dla vychadu z kanfliktnaj situacyi IP prapanoŭvajuć kiraŭniku rajvykankama pryniać nastupnyja miery: 

- nieadkładna nakłaści maratoryj na kanfiskacyi i pravierki ŭ miežach ukaza № 222 da terminu pryniaćcia rašeńnia pa supravadžalnych dakumientach, jakoje zadavolić usie zacikaŭlenyja baki;

- nakłaści maratoryj na kanfiskacyi i pravierki ŭ miežach dziejańnia techničnaha rehłamientu Mytnaha sajuza ŭ dačynieńni da IP z-za masavaha nievykanańnia hetych praviłaŭ u krainach-partniorach;

- pravieści terminovyja pieramovy z udziełam pradstaŭnikoŭ RHA «Pierśpiektyva» i šyrokaha koła inšych pradprymalnickich struktur, a taksama orhanaŭ ułady pa pytańniach nakładnych i siertyfikataŭ;

- pravieści na praciahu najbližejšaha času rabočuju sustreču kiraŭnictva RHA «Pierśpiektyva» jak niezaležnaj arhanizacyi, jakaja ŭličvaje intaresy pradprymalnikaŭ i dziaržavy ŭ cełym, z kiraŭnictvam rajonnaha vykanaŭčaha kamiteta horada Połacka.

Zvarot padpisany staršynioj savieta RHA «Pierśpiektyva» Anatolem Šumčankam. 

Jak paviedamiŭ BiełaPAN Šumčanka, ranicaj 18 kastryčnika na Połackim rynku prajšoŭ schod IP. Kala 200 čałaviek uchvalili tekst zvarotu i pačali źbirać pad im podpisy. Kopija zvarotu budzie nakiravanaja ŭ Administracyju prezidenta. 

Pradprymalniki vyrašyli pačać pracu, jakuju spynili 16 kastryčnika. Ale kali pravierki adnoviacca, adnovicca i zabastoŭka, padkreśliŭ Šumčanka. 

Zhodna z ukazam № 222 1 sakavika 2015 hoda zakončyŭsia termin, kali IP mahli realizavać reštki pradukcyi lehprama, uviezienaj z krain Mytnaha sajuza biez dakumientaŭ, jakija paćviardžajuć nabyćcio i pastupleńnie hetych tavaraŭ. Pradprymalniki nieadnarazova sprabavali rastłumačyć uradu, što pa šerahu abjektyŭnych pryčyn nie zmohuć pracavać u novych umovach, ale ich mierkavańnie čynoŭniki ihnaravali. Paśla chvali zabastovak IP, jakija prajšli ŭ sakaviku pa ŭsioj krainie, termin realizacyi tavaraŭ biez dakumientaŭ praciahnuli da 1 studzienia 2016 hoda.

Tym nie mienš IP praciahvajuć zajaŭlać, što nie zmohuć pracavać u novych umovach, bo ich pastaŭščyki, pieravažna z Rasii, admaŭlajucca vydavać dakumienty na tavary, jakija mohuć paćvierdzić pachodžańnie pradukcyi.

• 0
• 0
• 0
• 0
• 0
• 0
• 0
• 0