Valutnaja vyručka Biełarusi praciahvaje źmianšacca

U vieraśni valutnaja vyručka Biełarusi skłała 2,48 młrd. dołaraŭ, źniziŭšysia na 29,9% u paraŭnańni z anałahičnym pieryjadam 2014 hoda. Jak śviedčać źviestki Nacbanka, u paraŭnańni sa žniŭniem hetaha hoda valutnaja vyručka ŭ vieraśni źniziłasia amal na 160 młn. dołaraŭ.

Takim čynam, valutnaja vyručka ŭ vieraśni źniziłasia amal da minimalnaha ŭzroŭniu, jaki byŭ zafiksavany ŭ lutym hetaha hoda — 2,3 młrd. dołaraŭ. 

Usiaho ŭ studzieni—vieraśni 2015 hoda valutnyja pastupleńni Biełarusi skłali 24,9 młrd. dołaraŭ i źnizilisia ŭ paraŭnańni z anałahičnym letašnim pieryjadam na 24,2%, abo amal na 8 młrd. dołaraŭ u hrašovym vyražeńni. 

Źnižeńnie valutnaj vyručki abumoŭlena hałoŭnym čynam skaračeńniem pastupleńniaŭ ad ekspartu tavaraŭ, pasłuh i ŭnutranaha handlu za valutu. 

Tak, u studzieni—vieraśni pastupleńni ad ekspartu tavaraŭ skłali 19,84 młrd. dołaraŭ i źnizilisia na 6,7 młrd. dołaraŭ, vyručka ad ekspartu pasłuh skłałasia na ŭzroŭni 4,49 młrd. dołaraŭ i skaraciłasia prykładna na 0,8 młrd. dołaraŭ. Razam z tym pastupleńni ad unutranaha handlu za valutu skłali 107,1 młn. dołaraŭ i źmienšylisia bolš čym u čatyry razy ŭ paraŭnańni sa studzieniem—vieraśniem 2014 hoda. 

Značnaje skaračeńnie valutnaj vyručki Biełarusi ad ekspartu tavaraŭ ekśpierty tłumačać źnižeńniem popytu ŭ Rasii na pradukcyju biełaruskaj vytvorčaści. Zhodna sa źviestkami za studzień—vierasień, valutnyja pastupleńni Biełarusi z Rasii skłali 9,47 młrd. dołaraŭ i źnizilisia ŭ paraŭnańni z anałahičnym letašnim pieryjadam bolš čym na 4 młrd. dołaraŭ. 

Pry hetym pastupleńni ad ekspartu tavaraŭ z Rasii skłali 7,5 młrd. dołaraŭ i źnizilisia amal na 3,5 młrd. dołaraŭ u paraŭnańni z anałahičnym letašnim pieryjadam. 

Rezkaje skaračeńnie pastupleńniaŭ ad unutranaha handlu za valutu biełaruskija ekanamisty tłumačać palitykaj Nacbanka pa dedałaryzacyi ekanomiki. Nahadajem, viasnoj hetaha hoda rehulatar zabaraniŭ vykarystańnie raźlikaŭ u zamiežnaj valucie za turystyčnyja i strachavyja pasłuhi. Adnačasova z hetym była ŭstanoŭlena zabarona na raźliki za paliva na aŭtazapravačnych stancyjach u SKV. 

U vieraśni Nacbank pryniaŭ novyja miery pa dedałaryzacyi raźlikaŭ. Zhodna z pastanovaj № 515, jakaja nabyła moc 16 vieraśnia, było zabaroniena vykarystoŭvać zamiežnuju valutu pry ažyćciaŭleńni raźlikaŭ pamiž jurydyčnymi asobami — rezidentami z udziełam rezidentaŭ svabodnych ekanamičnych zon i pry ažyćciaŭleńni raźlikaŭ pa asobnych vidach dahavoraŭ strachavańnia.

• 0
• 0
• 0
• 0
• 0
• 0
• 0
• 0