Dvuboj u karaleŭstvie kryvych lusterkaŭ

Ułada pačnie ličycca ź idejnymi apanentami, jak tolki tyja pačnuć vyvodzić na vulicy 50 tysiačaŭ čałaviek. Piša Alaksandar Kłaskoŭski.

Ad spravazdačaŭ prafesara Manajeva kryvicca i ŭłada, i apazycyja. Pieršaj jany psujuć malunak ahłušalnaje pieramohi, druhoj – malunak revalucyi duchu.

Pakiniem ubaku pytańnie pra pahrešnaść strachu dy inšyja čyńniki, što peŭna ž upłyvajuć na dakładnaść sacyjalohii, navat niezaležnaj, u karaleŭstvie kryvych lusterkaŭ.

Što da revalucyi duchu, dyk jaje ciaham sakavickaha Tydnia voli tysiačy indyvidaŭ nasamreč pieražyli – na ŭzroŭni asabovaha mikrakosmu.

Jość spakusa ekstrapalavać hety praces na ŭsio hramadztva. Ale nasamreč cełyja jahonyja płasty zastalisia amal što nie razvarušanymi.

Pavodle hrupy Manajeva, mienskuju Płošču uchvalili tolki 20,4% respandentaŭ, admoŭna ž pastavilisia da jaje 45,9%. Blizu 60% ličać, što sytuacyja ŭ krainie raźvivajecca ŭ pravilnym kirunku. Eŭrapiejcami pačuvajucca tolki 36%, u toj čas jak savieckimi ludźmi – až 52%.

Elektaralnaja arytmetyka pakul što nibyta na karyść ułady. Inšaja reč, što heta vielmi chistkaja arytmetyka.

Apošnija hady ŭładzie niejmavierna šenciła z vonkavaj ekanamičnaj kańjunkturaj. Ale viarchi stali jaje zakładnikami. Miler (i Kreml za jahonaj śpinaj) vyznačajuć los biełaruskaha «ekanamičnaha cudu» ŭ nieparaŭnalna bolšaj stupieni, čym Sidorski z Prakapovičam.

Starejšyja pamiatajuć hrozny praletarski bunt krasavika 1991 hodu. Tady paŭłaŭskaje – jašče ŭsiesajuznaje – padvyšeńnie cenaŭ vyvieła na płošču Lenina sto tysiačaŭ.

Vykid revalucyjnaje mahmy adbyŭsia, zaŭvažcie, u samaj savietyzavanaj respublicy. I apazycyja navat palcam pavarušyć nie paśpieła. Prosta praletary ubačyli, što za rubiel u zavodzskaj stałoŭcy ŭžo nie paabiedaješ.

Tady bunt ułahodzili palijatyvami, bo nie było idejnaha avanhardu. Mocnaja apazycyja zdolnaja ačolić masavy impuls, nadać pratestavamu vykidu kumulatyŭny efekt.

Palitolah Valer Karbalevič ličyć: ułada tolki tady pačnie ličycca ź idejnymi apanentami, kali tyja pakažuć realnuju moc. Heta vuličnyja akcyi sa startavym ludzkim kapitałam ad 50 tysiačaŭ.

Z adnaho boku, pavodle hrupy Manajeva, hetym razam Milinkievič z Kazulinym udvaich nabrali mieniej za 30%. Ale jakija pratestavyja žarści razharelisia! Vidavočna, što apanenty režymu stali dziejničać bolej rašuča, dziorzka. A los pieramienaŭ, što b tam ni kazali, vyznačaje aktyŭnaja mienšaść, za jakoj u momant kryzy rušyć zazvyčaj pasiŭnaja balšynia.

Važna tolki, kab apazycyjnyja stratehi nie łunali ŭ empirejach virtualnaj revalucyi duchu. Badaj, varta rabić staŭku na evalucyju duchu – karpatlivuju štodzionnuju pracu, skiravanuju na infarmavańnie dy palityčnuju adukacyju hramady.

Impanuje kamunistyčnaja pryncypovaść Siarhieja Kalakina, jaki na niadaŭnim štabnym «razbory palotaŭ» samakrytyčna skazaŭ pra słaboje kryzisnaje planavańnie, niedachop kreatyvu, pravały presavaj słužby abjadnanaj apazycyi.

Zaznačym, što va ŭłady z kryzisnym menedžmentam jašče horaj. Jana psychuje i robić vialikija hłupstvy. U niejki momant adsutnaść narmalovaj zvarotnaj suviazi i brak adekvatnych pavodzinaŭ mohuć stać dla režymu fatalnymi.

Kali ž apazycyja navučycca być adekvatnaj, jana zajmieje šaniec vyjhrać vyrašalny dvuboj u karaleŭstvie kryvych lusterkaŭ.

• 0
• 0
• 0
• 0
• 0
• 0
• 0
• 0