Plitačnik i čempijonka. Siabar chłopca, padazravanaha ŭ zabojstvie treniera: «Kanflikt pačaŭsia z-za ramontu»
U paniadziełak 2 listapada krainu skałanuła šakujučaja navina pra źniknieńnie lohkaatletki Julii Bałykinaj — šmatrazovaj čempijonki Biełarusi ŭ spryncie, udzielnicy Alimpijady-2012.
Kančatkova los spartsmienki jašče nie vyśvietleny, ale Śledčy kamitet raspačaŭ kryminalnuju spravu pa artykule «Zabojstva». Nahodaj dla hetaha stali ślady, jakija vyjavili padčas ahladu kvatery Bałykinaj i jaje aŭtambila «Kia Rio». Spadziavańniaŭ, što spartsmienka žyvaja, amal nie zastałosia, piša Jeŭraradyjo.
Adnosiny raspalisia
Apošnim časam 31-hadovaja Julija pracavała dziciačym trenieram pry spartovym tavarystvie «Dynama». U 2013 hodzie jana była dyskvalifikavanaja na dva hady za vykarystańnie zabaronienych preparataŭ.
Tady ž u dziaŭčyny raźvivalisia adnosiny ź Dźmitryjem V., jakoha siońnia padazrajuć u jaje zabojstvie. Para žyła ŭ asabistaj kvatery Julii. Ale adnosiny raspalisia niekalki miesiacaŭ tamu. Jeŭraradyjo vyjšła na znajomych padazravanaha, jakija paviedamili padrabiaznaści.
Plitačnik i čempijonka
Dźmitryj V. na try hady maładziejšy za Juliju Bałykinu. Jon naradziŭsia va Ukrainie, potym siamja pierajechała ŭ Rasiju. Z hetaj pryčyny dahetul padazravany maje rasijskaje hramadzianstva. Baćki trahična zahinuli, i Dźmitryj V. pierajechaŭ da dziadzi i cioci ŭ Rahačoŭ, dzie vyras i vyvučyŭsia na plitačnika-tynkoŭščyka ŭ kaledžy.
«U Maskvie ŭ jaho navat naradziłasia dzicia»
«Jon byŭ siońnia tut, zaŭtra tam. Peŭny čas žyŭ i pracavaŭ u Maskvie, dzie ŭ jaho navat naradziłasia dzicia. Ale siamja raspałasia», — raspaviadaje adzin z adnahrupnikaŭ padazravanaha pa rahačoŭskim kaledžy.
Paśla Maskvy Dźmitryj V. pierajechaŭ u Minsk i paznajomiŭsia z pryhažuniaj-lohkaatletkaj Julijaj Bałykinaj. Baćki dziaŭčyny dapamahli joj zbudavać kvateru ŭ Minsku. A pachisnulisia adnosiny paśla taho, jak para pačała rabić tam ramont.
«Zdavałasia, što jon adekvatny čałaviek»
«Raźvitalisia jany niedzie dva miesiacy tamu. Da hetaha žyli narmalna, a potym pačaŭsia ramont, svarki. Voś, chutčej za ŭsio, nie pieražyli ramont. Ale, kab sprava dajšła da zabojstva, — ja nie viedaju. Zdavałasia, što jon adekvatny čałaviek», — vykazvaje zdahadki jašče adzin dobry znajomy Dźmitryja V. pa rahačoŭskim kaledžy. Chłopcy padtrymlivali adnosiny i ŭ Minsku.
Za dzień da trahiedyi, jak pryhadvaje krynica, Julija pavinna była zabrać zimovuju humu ź niedabudavanaha katedža svaich znajomych. Ale źnikła i nie adzvaniłasia. Telefon spartsmienki byŭ vyklučany.
«Źjavicca kala kvatery Julii, kab adamknuć dźviery dla milicyi»
«Praz paru dzion Dzima pavinien byŭ źjavicca kala kvatery Julii, kab adamknuć dźviery dla milicyi. I paśla hetaha jaho zatrymali. My navat nie viedajem, za što», — zakančvaje apovied znajomy.
17 vieraśnia Dźmitryj V. vykłaŭ u sacsietcy post z fotazdymkam Julii. U praciahłym tekście liryčny hieroj pryznavaŭsia ŭ kachańni i vybačaŭsia, što raniej nie nadavaŭ druhoj pałovie naležnaj uvahi.
«Tolki ciapier, praź miesiacy i hady, ja pačaŭ jaje adkryvać. Jana — taja krynica, jakoj napaŭniajusia. Inšyja krynicy — atruta», — siarod inšaha skazana ŭ hetym dopisie.
Vykazvajucca zdahadki, što kanflikt moh zdarycca na hlebie reŭnaści.
U toj ža čas siabroŭki Julii Bałykinaj pa sporcie abmiarkoŭvajuć viersiju, što «ŭsio zdaryłasia z-za hrošaj».
Śledčy kamitet paviedamlaje, što pravodziacca apieratyŭna-vyšukovyja mierapryjemstvy i śledčyja dziejańni, nakiravanyja na vyśviatleńnie ŭsich akaličnaściaŭ zdareńnia.
Julija Bałykina naradziłasia ŭ manholskim horadzie Bułhan. Pieravažna žyła ŭ Zaparožžy. Sportam pačała zajmacca vielmi pozna — u 18. U 23 hady spartsmienka pierajechała ŭ Biełaruś, stała čempijonkaj našaj krainy i pieršym numaram zbornaj na dystancyjach 100 i 200 mietraŭ. U svoj čas treniery spadziavalisia, što jana zmoža hodna zamianić alimpijskuju čempijonku Juliju Nieściarenka.
Ciapier čytajuć
Ananimy — historyi biełarusaŭ, jakim prychodzicca šyfravacca, bo režym ličyć ich dziejnaść «kryminałam»10
Ananimy — historyi biełarusaŭ, jakim prychodzicca šyfravacca, bo režym ličyć ich dziejnaść «kryminałam»
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary