Kuviejckaja hazieta Al-Rai paviedamiła pra padrychtoŭku Rasijaj razhortvańnia na druhoj vajennaj bazie ŭ Siryi. Hrupoŭka PKS RF, a taksama častki zabieśpiačeńnia i prykryćcia bazy buduć razhornutyja na aeradromie Šajrat u 35 kiłamietrach na paŭdniovy ŭschod ad Chomsa. Kolkaść avijacyjnaj hrupoŭki ŭ Siryi moža ŭzraści da sta samalotaŭ.
«Baza Šajrat maje 45 umacavanych avijacyjnych anharaŭ, jakija dazvalajuć abaranić samaloty ad trapleńniaŭ pry abstrele», — paviedamlaje śpiecyjalny karespandent haziety pa pytańniach biaśpieki Elijachu Dž. Mahnier sa spasyłkaj na krynicu ŭ sumiesnym rasijska-siryjska-irakska-iranskim štabie ŭ Damasku.
Jak adznačaje aŭtar artykuła, aeradrom maje trochkiłamietrovuju asnoŭnuju UPP, jakaja dazvalaje prymać samaloty lubych typaŭ, a taksama zapasnuju pałasu, padrychtoŭka jakoj da vykarystańnia zaviaršajecca ŭ ciapierašni čas.
Na dumku krynic vydańnia, vykarystańnie bazy Šajrat dazvolić davieści kolkaść rasijskaj avijahrupy ŭ Siryi bolš čym da 100 latalnych aparataŭ. Taksama ŭ rajonie buduć razhornutyja siły prykryćcia i zabieśpiačeńnia bazy.
Jak paviedamiła karespandentu «Lenty.ru» krynica ŭ rasijskich siłavych strukturach, vykarystańnie bazy Šajrat nieabchodnaje dla raźvićcia apieracyj na poŭdni i ŭschodzie Siryi. «Dla raźvićcia nastupu ŭ rajonie Palmiry i dalej na ŭschod, u Dejr-Ez-Zor, Chmiejmim užo dosyć daloka raźmieščany, asabliva dla dziejańniaŭ šturmavikoŭ i viertalotaŭ, dla jakich, akramia dalokaści palotu, istotnuju rolu adyhryvaje apieratyŭnaść paražeńnia celaŭ na poli boju i ŭ blizkim tyle», — adznačyła krynica. Pavodle jaje słoŭ, raniej rasijskija PKS užo vykarystali Šajrat jak aeradrom padskoku.
17 listapad 2015 h. u chodzie videaprezientacyi Minabarony była prademanstravanaja karta, na jakoj blizu bazy Šajrat byli adznačanyja pazicyi 5-j haŭbičnaj artyleryjskaj batarei 120-j hvardziejskaj artyleryjskaj bryhady rasijskaj armii, razhornutaj u rajonie z 6 listapada. Taksama na karcie vidać, što roŭna z hetaha ž momantu času (14:00, 6 listapada) na aeradromie Šajrat raźmieščanyja čatyry ŭdarnyja viertaloty Mi-24 i adzin transpartny viertalot Mi-8, ich prynaležnaść nie vyśvietlenaja.
Krynicy, blizkija da siłavych strukturaŭ Izraila, paviedamili, što ŭ ciapierašni čas na bazie Šajrat praciahvajucca raboty pa padrychtoŭcy aeradroma. Častkovym paćviardžeńniem hetych źviestak mohuć słužyć dadzienyja sajta Flightradar 24, zhodna ź jakimi ŭ rajonie Šajrata nazirajecca aktyŭnaść rasijskaj vajenna-transpartnaj avijacyi, uklučajučy samaloty An-124.
Kamientary