Pieršaja ŭ Biełarusi maštabnaja «Noč biblijatek» projdzie 22 studzienia ŭ Minsku, paviedamiŭ načalnik adździeła karparatyŭnych kamunikacyj kampanii velcom Viačasłaŭ Śmirnoŭ.
Arhanizatary mierapryjemstva — velcom, kłub «Mova TUT.BY», a taksama navukovaja biblijateka BNTU i Minskaja abłasnaja biblijateka im. A.S.Puškina, u jakich i adbudziecca akcyja.
«Noč biblijatek» projdzie z 19.00 da 23.00, uvachod volny.
Pa słovach Śmirnova, «Noč biblijatek» stanie kulminacyjaj adukacyjnaj prahramy fiestyvalu mabilnych buktrejleraŭ velcom Smartfilm, jaki arhanizavany ŭžo ŭ piaty raz. U hetym hodzie fiestyval pryśviečany videarolikam, jakija raspaviadajuć pra knihi.
U chodzie načnoj akcyi viadomyja biełaruskija miedyjnyja piersony, siarod jakich biznesmieny, spartsmieny, kulturnyja dziejačy, źbiarucca razam, kab pačytać usłych uryŭki ź lubimych knih biełaruskich aŭtaraŭ i z tvoraŭ zamiežnaj litaratury ŭ biełaruskim pierakładzie.
«Asnoŭnaja meta našaj novaj inicyjatyvy — papularyzacyja biełaruskaj litaratury, — adznačyŭ arhanizatar. — Ale jość i druhaja zadača — u ramkach konkursu pakazać našym udzielnikam i haściam, što biełaruskija tvory «zdymanyja», h.zn. pa ich možna zrabić dobraje kino, navat mabilnaje».
U hety viečar u Puškinskaj biblijatecy abranyja miescy sa svaich lubimych tvoraŭ buduć čytać litaratar Andrej Chadanovič, akcior Pavieł Charłančuk, televiadučy Hierman Citoŭ, hałoŭny redaktar sajta kyky.org Saša Ramanava i inšyja. U biblijatecy BNTU — zasnavalnik partała TUT.by Juryj Zisier, baskietbalist Alaksandr Kul, televiadučaja Hanna Bond, režysior, paetka i lider muzyčnaha kabare-benda «Sieriebrianaja svad́ba» Śviatłana Bień.
Akramia taho, u ramkach «Nočy biblijatek» projduć inšyja cikavyja mierapryjemstvy: majstar-kłasy pa redkich movach, kitajskaj kalihrafii, zdymcy kino na smartfon, adkrytyja ŭroki biełaruskaj movy ad kłuba «Mova TUT.BY», nastolnyja hulni, varkšopy pa napisańni kreatyŭnych tekstaŭ i rekłamnych słohanaŭ, masavy haradski bukkrosinh, dzie možna abmianiacca knihami, i, viadoma, pakaz videarolikaŭ-pieramožcaŭ fiestyvalu velcom Smartfilm minułych hadoŭ.
Ciapier čytajuć
Łukašenka raskazaŭ pra zabojstva apazicyjaniera, jakoje nibyta adbyłosia try dni tamu18
Kamientary