Navukoŭcy vyśvietlili, chto bolš lubić svaich haspadaroŭ — katy abo sabaki
Navukoŭcy raniej užo mieli važkija padstavy mierkavać, što sabaki sapraŭdy lubiać svaich haspadaroŭ, kaža aŭtar daśledavańnia Poł Zak. Pra heta piša»Maja płanieta» sa spasyłkaj na The Telegraph.
Niekalki nievialikich daśledavańniaŭ pakazali, što, kali čałaviek hulaje sa svaim sabakam, i haspadar, i hadavaniec vypracoŭvajuć aksitacyn — hałoŭny harmon lubovi ŭ mlekakormiačych. Hety harmon vypracoŭvajecca ŭ našym mozhu, kali my kłapocimsia pra kahości. Tak, kali my bačym muža/žonku ci dzicia, uzrovień aksitacynu ŭ kryvi pavialičvajecca na 40-60%.
Ci vypracoŭvajecca aksitacyn ŭ arhaniźmie katoŭ pry ŭzajemadziejańni z čałaviekam, da hetaha času było nieviadoma. I voś narešcie navukoŭcy praviali paraŭnalnyja testy: jany vymierali ŭzrovień harmonu u katoŭ i sabak paśla hulniaŭ z haspadarami.
U dziesiaci katoŭ i dziesiaci sabak byli ŭziatyja ŭzory śliny — pierad dziesiacichvilinnaj hulniavoj siesijaj z haspadarom i adrazu paśla jaje. Jak vyśvietliłasia, paśla hulni z haspadarom uzrovień aksitacynu ŭ sabak padvyšajecca ŭ siarednim na 57,2%, a ŭ katoŭ — usiaho tolki na 12%, heta značyć amal u piać razoŭ nižej.
Navukoŭcy kažuć, što jany byli pryjemna ździŭlenyja dźviuma rečami: pa-pieršaje, tym, što ŭzrovień aksitacynu ŭ sabak hetak vysoki, a pa-druhoje, tym, što ŭ katoŭ jon naohuł jość. Niekatoryja ličać, što katy naohuł nie lubiać ludziej, daśledavańnie ž pakazvaje, što heta nie tak.
Na dumku niekatorych navukoŭcaŭ, roźnica pamiž hatoŭnaściu sabak i katoŭ adkazvać na čałaviečyja emocyi moža być rastłumačanaja tym, što sabaki byli pryručanyja značna raniej. Pavodle dadzienych hienietyčnaha daśledavańnia, vyniki jakoha byli apublikavanyja ŭ hetym hodzie, praces pryručeńnia sabak pačaŭsia bolš za 30 000 hadoŭ nazad, tady jak katoŭ pačali pryručać na 20 000 hadoŭ paźniej.
Adroźnivajucca adno ad adnaho nie tolki katy i sabaki, ale i ich uładalniki. Niadaŭna vyśvietliłasia, što ŭładalniki sabak bolš adkaznyja, mienš nieŭratyčnyja i ŭ bolšaj stupieni źjaŭlajucca ekstraviertami, čym amatary katoŭ.
Kamientary