«Fantanka.ru»: U Siryi zahinuli dziasiatki rasijskich sałdat, jakija pracujuć na pryvatnuju vajennuju kampaniju
Aficyjnyja dadzienyja ab kolkaści rasiejskich vajskoŭcaŭ, jakija zahinuli padčas apieracyi ŭ Siryi, značna zanižanyja. Minabarony RF paćvierdziła hibiel nie bolš čym šaści rasijskich hramadzian, adnak žurnalisty śćviardžajuć, što na palach bitvaŭ byli zabityja dziasiatki rasiejcaŭ. U rasśledavańni, apublikavanym «Fantankaj», u pryvatnaści, havorycca pra toje, što ŭ Siryi na praciahu doŭhaha času vajavali bajcy de-jure nie isnujučaj pryvatnaj vajennaj kampanii (PVK), u skład jakoj uvachodziać sotni rasijskich aficeraŭ.
Žurnalisty vydańnia śćviardžajuć, što na terytoryi Siryi dziejničali bajcy bataljona ź ciažkim piachotnym uzbrajeńniem i braniatechnikaj, viadomaha jak PVK «Vahniera», jaki farmalna nie isnuje. Hetaha padraździaleńnia niama ni ŭ rejestry jurydyčnych asob, ni ŭ struktury siłavych viedamstvaŭ. Adnak jano na samaj spravie isnuje, a straty, jakija niasuć PVK u Siryi, pry hetym nie psujuć aficyjnuju statystyku Minabarony.
Pa infarmacyi vydańnia, vyšejzhadanaja PVK była sfarmiravana na asnovie «Słavianskaha korpusa», jaki dziejničaŭ u Siryi ŭ 2013 hodzie, pad kamandavańniem padpałkoŭnika zapasu Dźmitryja Utkina. Žurnalisty śćviardžajuć, što ź viasny 2014 hoda kampanija dziejničała na terytoryi Kryma i Łuhanskaj vobłaści, paśla čaho bajcy adpravilisia na vykanańnie zadač u Siryju.
Utkin — prafiesijny vajskoviec, jaki da 2013 hoda byŭ kamandziram dysłakavanaha ŭ Piačory Pskoŭskaj vobłaści 700-ha asobnaha atrada śpiecnaza 2-j asobnaj bryhady SPN Hałoŭnaha raźviedvalnaha ŭpraŭleńnia Minabarony. Paśla zvalnieńnia ŭ zapas jon pracavaŭ u Moran Security Group, pryvatnaj kampanii, jakaja śpiecyjalizujecca na achovie marskich sudoŭ u pirataniebiaśpiečnych rajonach.
U 2014 hodzie, pavodle infarmacyi krynicy, Utkin uznačaliŭ ułasnaje padraździaleńnie, jakoje pa jaho pazyŭnych atrymała ŭmoŭnuju nazvu PVK «Vahniera». Žurnalisty adznačajuć, što raniej źjaŭlalisia paviedamleńni ab śmierci Vahniera ŭ Danieckaj vobłaści, adnak jany akazalisia «kačkaj».
Isnavańnie PVK paćviardžajuć dakumienty za podpisam prezidenta RF
Žurnalistam «Fantanki» ŭdałosia znajści dakumientalnaje paćvierdžańnie isnavańnia «niefarmalnaha bataljona, jaki niejkim čynam pryznajecca aficyjnymi strukturami». Vydańniu nienazvanyja krynicy raspaviali pra toje, što bajcy Vahniera za bajavyja dziejańni na terytoryi Ukrainy i Siryi atrymlivajuć dziaržaŭnyja ŭznaharody. Žurnalisty taksama apublikavali zdymki ŭznaharodnych listoŭ i samich ordenaŭ.
«Na 23 lutaha, na 9 Maja — u Molkina (łahier padrychtoŭki bajcoŭ PVK u Krasnadarskim krai. — zaŭvaha NEWSru.com) uznaharodžańnie. Pryjazdžaje dziadźka sivy ŭ skuranoj lotnaj aficerskaj kurtcy, z vyhladu — čekist u zvańni nie nižej za hienierał-majora. Spačatku tym, chto žyvy ŭ strai, kamu orden Mužnaści, kamu — Advahi. Potym začytvaje tych, kaho ŭ strai niama, — paśmiarotna», — raspavioŭ žurnalistam adzin z surazmoŭcaŭ vydańnia.
U žurnalisckim rasśledavańni taksama zhadvajecca pra dvuch vajskoŭcaŭ — Andreja Jalmiejeva i Andreja Šrejniera, jakija byli pachavanyja 6 sakavika hetaha hoda na Alei Hierojaŭ Banykinskich mohiłak Taljaci. Tady miascovyja ŚMI paviedamlali ab tym, što mužčyny zahinuli va Ukrainie ŭ chodzie ŭzbrojenaha kanfliktu na Danbasie, dzie jany ŭvachodzili ŭ skład narodnaha apałčeńnia.
Tym mieniej «Fontanka» śćviardžaje, što ni Jalmiejeŭ, ni Šrejnier nie mieli nijakaha dačynieńnia da narodnaha apałčeńnia, a daŭno pracavali pa kantrakcie na Utkina. Žurnalisty adznačajuć, što ich imiony byli začytanyja ŭ strai padčas uznaharodžańnia ŭ Molkina. Ich abodvuch paśmiarotna ŭznaharodzili ordenam Mužnaści. U materyjale vydańnia pryvodziacca fatahrafii ŭznaharodnych listoŭ za podpisam prezidenta RF Uładzimira Pucina.
U Siryi zahinuli dziasiatki bajcoŭ «niabačnaha bataljona»
Žurnalisty adznačajuć, što ŭ ich niama dakładnych dadzienych pra straty PVK u Siryi, adnak surazmoŭcy vydańnia śćviardžajuć, što havorka idzie pra dziasiatki rasiejcaŭ. «Rota, jakaja zajšła ŭ Siryju ŭ vieraśni 2015 hoda, pakinuła jaje ŭ kancy śniežnia taho ž hoda, ale, jak kažuć tyja, chto viarnuŭsia, z 93 čałaviek žyvymi i nieranienymi viarnułasia tracina. Asnoŭnyja ž straty pačalisia ŭ studzieni-lutym, u bajach za Palmiru», — havorycca ŭ materyjale.
Składanaść dakumientalnaha paćvierdžańnia dakładnaha liku zahinułych bajcoŭ PVK u Siryi zaklučajecca ŭ tym, što navat słužačyja ŭ adnym uzvodzie nie zaŭsiody viedajuć nie tolki proźviščy, ale i imiony adzin adnaho. «Cikaŭnaść nie vitajecca. Z kim plačo ŭ plačo śviniec žuješ — časam imionaŭ nie viedali. Chto čym zajmaŭsia, chto, što — pra heta nie kažuć», — raspavioła krynica vydańnia.
U Siryi, pa prykładnych padlikach, znachodzicca padraździaleńnie Vahniera ŭ składzie kala čatyrochsot čałaviek. Kali žurnalist vydańnia, pytajučysia, vykazaŭ zdahadku, što ŭ łahiery padrychtoŭki bajcoŭ u Molkina sfarmiravany atrad z 250—300 čałaviek, to vyklikaŭ ščyry śmiech u svajho surazmoŭcy. «Try raźviedvalna-šturmavyja roty, u kožnaj ad dzievianosta da sta čałaviek. Try ŭzvody z SPH i AHS — rota ahniavoj padtrymki. Rota SPA z «ihołkami». Rota suviazi. Rota achovy. Miedčastki. Plus cyvilnyja — absłuhoŭvajučy piersanał. Biez cyvilnych — čałaviek šeśćsot», — raspaviali vydańniu.
Žurnalisty pry hetym adznačajuć, što pracent strat PVK u Siryi źjaŭlajecca vielmi niecharakternym dla pryvatnych vajennych kampanij, jakija, jak praviła, vykonvajuć u zonie bajavych dziejańniaŭ łakalnyja i vuzkaprafiesijnyja zadačy, jakija nie praduhledžvajuć chadžeńnia ŭ ataku. Surazmoŭcy vydańnia śćviardžajuć, što PVK vykarystoŭvaje ŭ Siryi «taktyku Druhoj suśvietnaj».
«Što my tam robim? Idziom pieršaj chvalaj. Navodzim avijacyju z artyleryjaj, vyciaśniajem supiernika. Za nami badziora zachodzić siryjski śpiecnaz, a śledam «Vieści-24» razam z ORT z kamierami napieravies iduć brać u ich intervju», — raspavioŭ adzin z bajcoŭ PVK, jaki viarnuŭsia ź Siryi.
«Tolki štykoŭ na AK nie chapaje, a to prosta Druhaja suśvietnaja. Jak było pad Debalcavam — u poli ludziej vyhaniali z technikaj, i kamanda — vaša zadača ŭziać umacavańnie, uziać błokpost. I napierad, prosta jak na miasa. Kali pa nas pačynali sa stadvaccatak kłaści, z «kord», z RPH pa technicy — ludzi… ich prosta vanitavała. Pramy z RPH — tolki ruki-nohi zastajucca. Biez navučańnia ŭ Molkina ŭ boj nikoha nie pašluć, ale čamu paśpiejuć navučyć — prosta elemientarna stralać, kab nie adrazu zdochnuć. U kaho jość bajavy dośvied — jany jašče niejak bolš-mienš žyvuć, ale ŭsio roŭna, nie toje», — uspaminaje jon.
U zaviaršeńnie žurnalisty adznačajuć, što kolkaść achvotnych trapić u PVK Vahniera značna bolšaja, čym kolkaść vakansij. Pry hetym, pavodle źviestak vydańnia, zarabotnaja płata ŭ pryvatnaj vajennaj kampanii składaje kala 240 tysiač rubloŭ u miesiac.
«PVK ŭ Rasii — daŭniaja tema»
Paśla taho jak «Fontanka» apublikavała svajo rasśledavańnie, vajenny žurnalist Arkadź Babčanka daŭ intervju partału «Adkrytaja Rasija», u jakim padzialiŭsia svaim staŭleńniem da PVK, jakija, pavodle jaho słoŭ, isnujuć u Rasiei ŭžo doŭhija hady.
«PVK ŭ Rasii — daŭniaja tema. Čas ad času ŭspłyvajuć niejkija čutki ab śpiecyjalnych zakonach, pačynajucca razmovy pra nieabchodnaść zakanadaŭča niešta prapisać, ale ŭsio heta dla łochaŭ. PVK ŭ Rasii isnujuć daŭno. Ja sam adzin raz padumvaŭ ŭładkavacca ŭ PVK pry «Łukojle». «Łukam-A» — jość takaja struktura. Adzin čas jana navat na HeadHunter vyviešvała abjavy, nabirała ludziej. Asabliva pažadanyja byli vypuskniki pavietrana-desantnych vučelniaŭ. Zarpłata tam była šykoŭnaja, umovy słužby — šykoŭnyja», — raspavioŭ jon.
Pry hetym Babčanka vielmi ździŭleny tym, što, pavodle infarmacyi žurnalistaŭ «Fantanki», bajcy PVK Vahniera dziejničajuć u Siryi «ŭ tradycyjach Druhoj suśvietnaj». «Sutnaść pryvatnych vajennych kampanij u tym, što jany vykonvajuć vielmi vuzkaśpiecyjalnyja zadačy. Jany nie chodziać u ataku. U krainach pieršaha śvietu PVK — nośbity samych pieradavych taktyk viadzieńnia boju i samych pieradavych technałohij. Tudy nabirajuć vielmi prafiesijnych ludziej, jakija doraha kaštujuć. Straty ŭ PVK nie takija vialikija: bajcy PVK umiejuć vajavać i nie lezuć na ražon», — adznačyŭ žurnalist.
«Što ž tyčycca hrupy Vahniera, to, kali mierkavać pa apisańni «Fantanki», heta navat nie PVK, a niejki pryvatny bataljon ź vielmi siarednim uzroŭniem padrychtoŭki», — dadaŭ Babčanka.
Pa aficyjnych dadzienych, za čas rasijskaj vajennaj apieracyi ŭ Siryi, z 30 vieraśnia 2015 hoda, zahinuli šeść čałaviek. U kastryčniku Minabarony paviedamiła pra hibiel 19-hadovaha kantraktnika Vadzima Kastenki. Pryčynaj jaho śmierci ŭ vajennym viedamstvie nazvali suicyd, adnak svajaki ŭsumnilisia ŭ takoj viersii.
Jašče dvoje vajskoŭcaŭ zahinuli ŭ listapadzie na rasiejska-tureckaj miažy paśla taho, jak tureckija vajennyja źbili rasijski samalot Su-24. Kamandzir ekipaža Aleh Piaškoŭ byŭ zabity ahniom ź ziamli, kali pryziamlaŭsia paśla katapultavańnia. Marpiech Alaksandr Pazynič zahinuŭ padčas apieracyi pa pošuku lotčykaŭ źbitaha bambavika. Taksama paviedamlałasia pra śmierć vajskoŭca Čaramisina.
17 sakavika prezident RF Uładzimir Pucin, vystupajučy ŭ Hieorhijeŭskaj zale Kramla na sustrečy z vajskoŭcami, jakija prasłavilisia ŭ chodzie vajennaj apieracyi ŭ Siryi, i ŭdovami zahinuŭšych, paćvierdziŭ hibiel piataha rasijskaha vajennaha Fiodara Žuraŭlova, pra śmierć jakoha aficyjna nie paviedamlałasia.
Pa dadzienych Reuters, kamandzir Žuraŭlova skazaŭ na pachavańni, što toj zahinuŭ u chodzie śpiecapieracyi suprać bajevikoŭ Kabardzina-Bałkaryi, ale siabar siamji zahinułaha i jaho susied vykazali zdahadku, što toj moh być zabity ŭ Siryi. Jašče adzin siabar siamji Žuraŭlova raspavioŭ ahienctvu, što vajskoviec słužyŭ pa kantrakcie ŭ śpiecnazie HRU. Žuraŭloŭ žyŭ u padmaskoŭnym Sałniečnahorsku, dzie znachodzicca centr śpiecyjalnaha pryznačeńnia «Sieniež», jaki ŭvachodzić u Siły śpiecyjalnych apieracyj (SSA). U Ministerstvie abarony i Ministerstvie zamiežnych spraŭ na zapyt ab miescy hibieli Žuraŭlova nie adkazali.
Pra śmierć šostaha rasijskaha vajskoŭca ŭ Siryi paviedamlałasia 24 sakavika. Tady pradstaŭnik avijabazy «Chmiejmim» raspavioŭ: «Pry vykanańni śpiecyjalnaj zadačy pa naviadzieńni udaraŭ rasiejskich samalotaŭ na mety terarystaŭ ID zahinuŭ aficer rasiejskich sił śpiecyjalnych apieracyj. Aficer vykonvaŭ bajavuju zadaču ŭ rajonie Palmiry na praciahu tydnia, vyjaŭlajučy najvažniejšyja abjekty ihiłaŭcaŭ i vydajučy dakładnyja kaardynaty dla naniasieńnia udaraŭ rasijskimi samalotami. Vajennasłužačy hieraična zahinuŭ, vyklikaŭšy ahoń na siabie, paśla taho jak byŭ znojdzieny terarystami i akružany».
Akramia taho, 23 sakavika kamanda Conflict Intelligence Team, jakaja nieadnarazova publikavała rasśledavańni ab hibieli rasijskich sałdat u Siryi, paviedamiła pra zabitaha ŭ arabskaj respublicy vajskoŭcy z RF. Pa ich dadzienych, im akazaŭsia aficer unutranych vojskaŭ RF Siarhiej Čupaŭ, jaki padčas vajny ŭ Afhanistanie byŭ kamandziram treciaha ŭzvoda čaćviortaj desantna-šturmavoj roty 56-j asobnaj desantna-šturmavoj bryhady.
Kamientary