U najbližejšyja piać hadoŭ Saviet ministraŭ płanuje pieradać z respublikanskaj u kamunalnuju ŭłasnaść bolšaść dziaržaŭnych aktyvaŭ. Heta praduhledžana prahramaj dziejnaści ŭrada na 2016—2020 hady, tekst jakoj apublikavany 11 krasavika na sajcie Saŭmina.
Restrukturyzacyja zakranie ŭnitarnyja pradpryjemstvy i akcyjaniernyja tavarystvy. «Pieradača ŭ kamunalnuju ŭłasnaść budzie hruntavacca na padychodach, jakija praduhledžvajuć kancentracyju kiravańnia na respublikanskim uzroŭni stratehičnymi arhanizacyjami, uklučajučy vała- i ekspartaŭtvaralnyja, subjektami naturalnych manapolij, a taksama infrastrukturnymi arhanizacyjami, jakija zabiaśpiečvajuć raźvićcio i funkcyjanavańnie halin ekanomiki», — skazana ŭ dakumiencie.
Na pieršym etapie ŭ kamunalnuju ŭłasnaść płanujecca pieradača arhanizacyj transpartu, handlu, bytavoha i miedycynskaha absłuhoŭvańnia, hramadskaha charčavańnia i budaŭnictva, nievialikich (da 25%) pakietaŭ akcyj inšych arhanizacyj, a taksama pakietaŭ akcyj i pradpryjemstvaŭ jak majomasnych kompleksaŭ z kolkaściu da 100 pracoŭnych.
Realizacyja hetaj miery, miarkujuć va ŭradzie, dazvolić aptymizavać funkcyi orhanaŭ dziaržkiravańnia, skancentravać ich na raspracoŭcy halinovaj palityki, skaracić zališnija i dublavalnyja funkcyi dziaržorhanaŭ i aptymizavać ich štatnuju kolkaść.
U 2016 hodzie ŭradam budzie stvoranaja mižviedamasnaja kaardynacyjnaja hrupa pa pytańniach pavyšeńnia efiektyŭnaści i restrukturyzacyi dziaržarhanizacyj i kiravańnia dziaržaŭnymi aktyvami. Da kanca vieraśnia hetaha hoda hrupa pavinna budzie raspracavać kompleksnuju stratehiju refarmavańnia i restrukturyzacyi dziaržarhanizacyj.
Paralelna płanujecca pieradavać asobnyja kampanii ŭ kiravańnie Dziaržkamitetu pa majomaści dla ŭkaranieńnia pieradavoj praktyki karparatyŭnaha kiravańnia ŭ akcyjaniernych tavarystvach. «Da siaredziny 2017 hoda budzie praviedzienaja acenka ŭździejańnia hetaj miery na zabieśpiačeńnie prybytkovaści i efiektyŭnaści hetych arhanizacyj z nastupnym pryniaćciem rašeńniaŭ pa raspaŭsiudžvańni takoj praktyki na inšyja kamiercyjnyja aktyvy dziaržavy. Da kanca 2018 hoda taki padychod budzie šyroka prymianiacca ŭ dačynieńni da ŭsich akcyjaniernych tavarystvaŭ, jakija znachodziacca ŭ respublikanskaj ułasnaści», — adznačajuć raspracoŭščyki prahramy.
Budzie taksama zabiaśpiečvacca ŭkaranieńnie sučasnych sistem karparatyŭnaha kiravańnia ŭ bujnych dziaržaŭnych arhanizacyjach, padzieł funkcyj rehulatarnaha nahladu i ŭłaśnika, praviadzieńnie IPO (publičnaje raźmiaščeńnie dadatkovych vypuskaŭ akcyj) na mižnarodnych i ajčynnaj biržach.
U 2016 hodzie buduć raspracavanyja dakładnyja kryteryi dla adniasieńnia dziaržaŭnych arhanizacyj da arhanizacyj, jakija nie padlahajuć pryvatyzacyi, a taksama da tych, što rychtujucca dla pryvatyzacyi ŭ budučyni, skazana ŭ dakumiencie.
Nahadajem, prahrama dziejnaści ŭrada na najbližejšyja piać hadoŭ, prezientavanaja premjer-ministram Andrejem Kabiakovym, była ŭchvalenaja Pałataj pradstaŭnikoŭ 5 krasavika.
Kamientary