Aŭtuchovič — lidaram apazicyi: Ci nie čas vam syści na piensiju?
Toje, čaho nie zdoleŭ zrabić Mikoła Statkievič, atrymlivajecca ŭ jeŭradeputataŭ, siabraŭ kiroŭnaj Jeŭrapiejskaj narodnaj partyi: na Kanhres da Statkieviča lidary apazicyi 15 traŭnia nie pryjšli, zatoje ŭsie sabralisia za adnym stałom 16 traŭnia ŭ staličnym hateli «Reniesans». Na zakliki Statkieviča abjadnacca jaho paplečniki pa demakratyčnaj apazicyi adkazvajuć maŭčańniem albo admovaj, na sustrečy ź jeŭrapiejskimi palitykami jany demanstrujuć hatoŭnaść da supolnaj pracy na vybarach.
Tym bolš što i Bohdan Zdrajeŭski, i Sandra Kałnijete, i Devid Makalister ź Jeŭraparłamienta, i kiraŭnik Pradstaŭnictva ES ŭ Biełarusi Andrea Viktaryn u svaich pramovach abaviazkova zhadvajuć blizkija parłamienckija vybary. Kažuć, što buduć uvažliva za imi sačyć, što vynik hetych vybaraŭ budzie mieć vialikaje značeńnie… Nu jak tut nie demanstravać adkaznaje staŭleńnie da vybarčaj kampanii i lidaram biełaruskaj apazicyi? Ale što kankretna jany kažuć u adkaz jeŭrapiejskim haściam?
«My budziem prykładać namahańni, my budziem patrabavać supolna z našymi kalehami pravodzić kampaniju nazirańnia, kaardynavać vysiłki ŭ padrychtoŭcy i praviadzieńni vybarčaj kampanii. A taksama ŭ praviadzieńni akcyj pratestu ŭ vypadku falsifikacyj vybaraŭ», — zajaŭlaje sustaršynia Biełaruskaj Chryścijanskaj demakratyi Vital Rymašeŭski.
I papiaredžvaje jeŭrapiejskich palitykaŭ: pakul nie projduć sumlennyja i prazrystyja vybary, nie varta zaklučać niejkija pahadnieńni z «nielehitymnaj» uładaj.
Staršynia Partyi BNF Alaksiej Janukievič raić jeŭrapiejcam aściarožna supracoŭničać ź biełaruskimi ŭładami, pieraścierahaje nakont niebiaśpieki rostu rasijskaha ŭpłyvu, raić pavialičyć finansavańnie «biełaruskich prajektaŭ» — i… ni słova pra budučyja vybary.
Mikoła Statkievič adrazu papiaredžvaje: doŭha siadzieć za «kruhłym stałom» jon nie moža, śpiašajecca da stamatołaha, a tamu adrazu skaža ŭsio, što maje skazać.
«Vybaraŭ niama, ale čamuści my majem 7 apazicyjnym śpisaŭ na vybarach — siem! U nas vybary ŭ adzin tur, i my sami kradziem u siabie pieramohu navat biez dapamohi ŭłady: adnosnaj bolšaści dastatkova dla pieramohi, a ad ułady budzie tolki adzin kandydat na akruhu! Heta biezadkaznaje staŭleńnie. My nie zdolnyja hetamu zaškodzić, bo nie zdolnyja navat abmierkavać z vami, ci varta ŭdzielničać u vybarach. Jašče vosieńniu usie tut prysutnyja kazali: «My nie pojdziem na vybary bieź źmienaŭ u zakanadaŭstvie!» I adrazu siem śpisaŭ!»
Statkievič zaklikaje dziejničać pa pryncypie «adna akruha — adzin apazicyjny kandydat». Kalehi ž u hety čas albo hladziać u płanšety, albo «ŭnosiać praŭki ŭ tekst svajho vystupu».
Taćciana Karatkievič, staršynia kampanii «Havary praŭdu», temu vybaraŭ nie abminaje. Ale jak? Zhadvaje vybary prezidenckija 2015 hoda i kanstatuje: dziakujučy ŭdziełu «ŭdałosia dahrukacca da novych ludziej, zacikavić ich palitykaj i inicyjavać dyjałoh unutry krainy». I miž inšym dadaje, što «Havary praŭdu» «nie svarycca ŭnutry apazicyi ni z kim».
Vidać, tamu ni z kim i nie śpiašajecca abjadnoŭvacca — kab spakusy pasvarycca nie było.
Namieśnik staršyni Ruchu «Za svabodu» Juraś Hubarevič niečakana zajaŭlaje, što apazicyja i tak «adzinaja ŭ svaim padychodzie da taho, što musić być zroblena padčas luboj vybarčaj kampanii».
Hubarevič: «U vybarčyja kamisii musiać trapić siabry apazicyjnych partyj, i takaja mahčymaść jość bieź źmieny zakanadaŭstva. Naziralniki pavinnyja bačyć padlik hałasoŭ na ŭłasnyja vočy — padlik musić vieścisia publična i hałosna».
Tady apazicyja atrymaje deputackija mandaty, upeŭnieny Hubarevič. Vidać, biez usialakaha abjadnańnia i pry najaŭnaści choć siami, choć dziesiaci śpisaŭ apazicyjnych kandydataŭ.
«U 2010 hodzie ŭsie kryčali-kryčali pra abjadnańnie, u vyniku pabiehli kožny paasobku i zajmieli samyja haniebnyja vybary ŭ historyi apazicyi. Toje ž budzie i zaraz», — kaža Uładzimir Niaklajeŭ, adzin z udzielnikaŭ prezidenckaha zabiehu-2010.
Staršynia BSDP «Hramada» Iryna Vieštard sprabuje siabie ŭ roli «hołasu rozumu»
«Davajcie nie budziem paproki kidać adno adnamu. Ja liču, što častka vybarčaha pasłańnia moža być ahulnaja dla ŭsioj apazicyi, što na niejkich akruhach mohuć być sapraŭdy adzinyja kandydaty, my možam navat padumać pra toje, ci nie źniacca nam u kancy vybarčaj kampanii».
Vynik vybarčaj sprečki koratka padvodzić palitviazień Mikoła Aŭtuchovič, jaki da hetaha cicha siadzieŭ pa-za miežami «kruhłaha stała».
«U mianie šmat da vas pytańniaŭ, ale naŭrad ci ja atrymaju na ich adkazy. Bo adkazaŭ prosta niama. I ja prosta kažu vam: ci nie praściej sabracca vam za kruhłym stałom i skazać: «Ludzi darahija, prabačcie nam: my za 20 hadoŭ ničoha nie zmahli zrabić, my pojdziem na piensiju!» Bo śmiešna ž!»
Praŭda, u lidaraŭ apazicyi na heta inšy pohlad. Jany pojduć na čarhovyja vybary. I ŭ čarhovy raz paasobku.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj34
Kamientary