Los prajektu BTS‑2, zaklikanaha vyrašyć prablemu nienadziejnaha tranzitu nafty praź Biełaruś, dahetul nia vyrašany. Usio zaležyć ad stupieni lajalnaści Miensku, kažuć u Maskvie.
Letašni studzieński naftavy kanflikt spravakavaŭ Rasieju paskoryć realizacyju prajektu 2‑j Bałtyjskaj trubapravodnaj systemy (BTS‑2). Prajekt musiŭ vyrašyć prablemu kanfliktaŭ z krainami‑tranzyciorami rasiejskaj nafty, najpierš ź Biełaruśsiu. Rasiejskaja «Transnafta» mierkavała pabudavać novy naftapravod u abychod našaj krainy, z kaniečnymi kropkami ŭ partach Prymorsk i Ŭść‑Łuha. BTS‑2 musiŭ pierapampoŭvać 75 młn t nafty štohod, usiaho ž praź Biełaruś pierapampoŭvajecca 103 młn t nafty. U žniŭni 2007 hodu prajekt pabudovy 2‑j čarhi BTS adobryła Hałoŭnaja dziaržekspetyza RF, paśla čaho ŭrad zahadaŭ Minpramenerha padrychtavać nieabchodnyja dakumenty da kanca hodu. Adnak z pastaŭlenaj zadačaj ministerstva nia spraviłasia i adkłała padrychtoŭku dakumentaŭ da sakavika 2008 hodu.
Pastupova impet rasiejcaŭ pačaŭ apadać. Jak paviedamlaje ekanamičny štotydniovik «Biełorusy i rynok», ideja chutčejšaj pabudovy BTS‑2 styknułasia z supracivam profilnych čynoŭnikaŭ u rasiejskim uradzie, a sam prajekt tak i nia byŭ uzhodnieny ŭ Minpramenerha Rasiei. Niekatoryja pryncypovyja punkty prajektu byli pierahledžanyja. U pryvatnaści, kančatkovaja mahutnaść trubapravodu była źmienšanaja da 50 młn t.
Los novaha trubapravodu, a za adno j biełaruskaj «Družby», nieadnojčy vyrašaŭsia na šmatlikich sustrečach rasiejskich uradoŭcaŭ i kiraŭnikoŭ zacikaŭlenych kampanijaŭ. Pavodle rasiejskich ŚMI, u takich abmierkavańniach prymali ŭdzieł i tahačasnyja prezydent RF Uładzimier Pucin i kiraŭnik uradu Viktar Zubkoŭ. Aktyvizavalisia i łabisty: pry ŭdziele «Surhutnaftahazu» «Transnafta» vyrašyła admovicca ad udziełu ŭ prajekcie porta Prymorsk.
Adnak, jakim nie apyniecca ŭ kančatkovym vyniku prajekt BTS‑2, piša «BR», rasiejski ŭrad pavinien budzie vyznačycca adnosna dalejšaha losu biełaruskaha naftapravodu «Družba» — pakinuć jaho ŭ jakaści klučavoha tranzytnaha šlachu va Ŭschodniuju Eŭropu, ci pazbavić jaho hetaha stratehičnaha značeńnia.
Vydańnie pryvodzić słovy byłoha kiraŭnika «Transnafty» Siamiona Vajnštoka pra toje, što ŭ ekanamičnym značeńni prajekt BTS‑2 niavyhadny na 100%, ale jahony los całkam zaležyć ad pavodzinaŭ aficyjnaha Miensku.
Ciapier čytajuć
Stała viadoma imia jašče adnaho pałkoŭnika DFR, aryštavanaha KDB. Jon raskazvaŭ sukamiernikam, jak jaho katavali12
Kamientary