Zachodnija krainy sprabujuć ubić klin u adnosiny pamiž Biełaruśsiu i Rasijaj, ale im nie ŭdasca heta zrabić, zajaviŭ staršynia kamiteta Dziaržaŭnaj dumy RF pa spravach SND, jeŭrazijskaj intehracyi i suviaziach z suajčyńnikami, člen kamisii Parłamienckaha schodu Sajuza Biełarusi i Rasii pa infarmacyjnaj palitycy Leanid Słucki 10 červienia ŭ Minsku na 50-j siesii Parłamienckaha schodu, pryśviečanaj 20-hodździu intehracyi Biełarusi i Rasii.
«Našy zachodnija partniory z zajzdrosnaj upartaściu sprabujuć ubić klin pamiž našymi krainami, ale zrabić heta niemahčyma, jak by časam niehatyŭna, hrebliva jany nie stavilisia da Sajuznaj dziaržavy», — zajaviŭ parłamientaryj.
Słucki pracytavaŭ artykuł u adnym ź niamieckich ŚMI, dzie nibyta było skazana, što žychary dźviuch krain sapraŭdy atrymali mahčymaść svabodnaha pieramiaščeńnia cieraź miažu bieź viz, praktyčna adnolkavyja mahčymaści pa pracaŭładkavańni i vybary miesca žycharstva, adnak «Minsk i Maskva vyčarpali na siońnia mahčymaści dla sumiesnaha ekanamičnaha rostu, i Sajuznaja dziaržava siońnia źjaŭlajecca mifam pra adzinstva narodaŭ».
«Na žal, za apošnija niekalki miesiacaŭ u zachodnich srodkach masavaj infarmacyi takija acenki źjaŭlajucca dosyć častymi, ale dziejnaść Parłamienckaha schodu dakazvaje, što jany źjaŭlajucca stroha supraćlehłymi realnaści», — ličyć rasijski deputat.
Jon padkreśliŭ, što parłamientaryi Sajuznaj dziaržavy razam prajšli «ciažkija dla Biełarusi časy, kali ZŠA i Jeŭrasajuz błakavali jaje sankcyjami, abvinavačvali ŭ tatalitaryźmie».
«I ciapier, ja ŭpeŭnieny, my pieraadolejem prablemy, jakija isnujuć u suśvietnaj palityčnaj i infarmacyjnaj prastory, źviazanyja z prymianieńniem dyskryminacyjnaha antypravavoha sankcyjnaha miechanizma, u pieršuju čarhu, u Jeŭrasaviecie suprać Rasii, i umacujem našy dvuchbakovyja adnosiny», — zajaviŭ Słucki.
«Za hetyja 20 hadoŭ nam davodziłasia čuć na adras Sajuznaj dziaržavy roznyja acenki. Adna dziela abjektyŭnaści siońnia treba pryznać: adzinaje abmiežavańnie, ź jakim hramadzianie našych krain sutykajucca na miažy pamiž Biełaruśsiu i Rasijaj, — heta abmiežavańnie chutkaści ruchu», — skazaŭ deputat Dziarždumy.
Pavodle jaho słoŭ, luby rasijanin ci biełarus moža žyć i pracavać na prastory ad Uładzivastoka da Bresta, «luby z nas moža havaryć, jak niadaŭna vielmi vyrazna prymieciŭ Alaksandr Ryhoravič Łukašenka, na našaj ruskaj movie». «Heta i jość hałoŭnyja vyniki taho histaryčnaha rašeńnia, jakoje było pryniataje 20 hadoŭ tamu, 2 krasavika 1996 hoda (ab intehracyi Biełarusi i Rasii)», — upeŭnieny Słucki.
U adpaviednaści z ukazam Alaksandra Łukašenki ad 8 červienia Słucki ŭznaharodžany ordenam Pašany.
Kamientary