Navukoŭcy adkryli novy hien dziakujučy Ice Bucket Challenge

Dabračynny fłešmob Ice Bucket Challenge, udzielniki jakoha ablivalisia chałodnaj vadoj i vykładvali videa hetaha ŭ sacsietki, dapamoh prafinansavać važnaje navukovaje adkryćcio, zajaviła Asacyjacyja bakavoha amijatrafičnaha sklerozu.

Pavialičyć

Navukoŭcy adkryli novy hien — NEK1, jaki maje dačynieńnie da ŭźniknieńnia spadčynnaj formy hetaha zachvorvańnia, viadomaha taksama jak chvaroba Łu Hierynha.

Fłešmob Ice Bucket Challenge, jaki zdabyŭ virusnuju papularnaść ŭ 2014 hodzie, dapamoh sabrać 115 młn dalaraŭ, niahledziačy na krytyku, što na fonie masavaj papularnaści suviaź pamiž samim ablivańniem chałodnaj vadoj i jaho dabračynnaj metaj była stračanaja.

Sabranyja hrošy pajšli na šeść navukovych daśledavańniaŭ.

Hrupa navukoŭcaŭ, jakija nazyvajuć siabie Project MinE, praviała najbujniejšaje ŭ historyi daśledavańnie spadčynnaha bakavoha amijatrafičaha sklerozu i apublikavała jaho vyniki ŭ časopisie Nature Genetics.

Bolš za 80 daśledčykaŭ u 11 krainach zajmalisia pošukam hienaŭ, źviazanych z ryzykaj hetaha zachvorvańnia.

Vyjaŭleńnie hiena NEK1 aznačaje, što ciapier navukoŭcy mohuć raspracavać hiennuju terapiju dla lačeńnia bakavoha amijatrafičnaha sklerozu. Choć na spadčynnuju formu prypadaje tolki 10% usich vypadkaŭ hetaha zachvorvańnia, navukoŭcy ličać, što hienietyka hraje rolu ŭ značna bolšym pracencie vypadkaŭ.

Kampanija pačałasia ŭ lipieni 2014 hoda. Udzielniki fłeš-mobu vylivali na siabie viadro ledzianoj vady, paśla čaho kožny ź ich kidaŭ vyklik lubym trom ludziam. Tyja, u svaju čarhu, na praciahu 24 hadzin pavinny byli paŭtaryć praceduru abo zrabić achviaravańnie na karyść fondu pa vyvučeńni zachvorvańnia.

Usiaho ŭ fejsbuk było zahružana bolš za 17 młn videa, u jakich ludzi ablivajucca ledzianoj vadoj. U fłešmobie ŭziali ŭdzieł šmatlikija znakamitaści, u tym liku zasnavalnik sacsietki Mark Cukierbierh.

U ZŠA na chvarobu Łu Hieryha, abo bakavy amijatrafičny skleroz, pakutujuć kala 30 tysiač čałaviek. Dla paraŭnańnia, chvaroba Alchiejmiera dyjahnastavanaja ŭ bolš čym za piać miljonaŭ čałaviek.

U takich umovach, jak kazali inicyjatary fłešmoba, farmaceŭtyčnym kampanijam prosta niavyhadna zajmacca daśledavańniami zachvorvańnia. Vierahodna, samym viadomym chvorym na amijatrafičny skleroz źjaŭlajecca brytanski fizik Styvien Chokinh.

U bolšaści vypadkaŭ skleroz pastajanna prahresiruje, ciahlicavaja słabaść pastupova achoplivaje ŭsie častki cieła.

• 0
• 0
• 0
• 0
• 0
• 0
• 0
• 0