Pakul uvieś śviet začaravana sočyć za navinami z Rya i zaŭzieje za svaje nacyjanalnyja kamandy, u Ńju-Jorku adbyvajucca chaj i nie takija maštabnyja, ale značnyja łakalnyja padziei.
U minułuju subotu ŭ Centralnym parku kala 20 asnoŭnych dziejačaŭ biełaruska-amierykanskaha abjadnańnia «Pahonia» sustrelisia ŭ niefarmalnaj abstanoŭcy, kab abmierkavać płany na bližejšy čas, a taksama paznajomić novaprybyŭšych u ZŠA biełarusaŭ z tym, čym zajmajecca arhanizacyja.
«Takija sustrečy — vydatny sposab paznajomicca z suajčyńnikami i nabyć novych siabroŭ, jakija nie tolki rastłumačać, jak razabracca z novym asiarodździem, ale i mohuć dać słušnyja parady nakont patencyjnaj pracy, vučoby, ci prosta padzielacca «tips and tricks» (paradami i rekamiendacyjami) dla žyćcia ŭ Amierycy», — adznačyŭ staršynia abjadnańnia Vital Zajka.
Asnoŭnaj temaj stała abmierkavańnie vybaraŭ deputataŭ pałaty pradstaŭnikoŭ Biełaruś, jakija majuć adbycca nieŭzabavie. Pazicyja arhanizacyi ŭ asobie kiraŭnika i ŭdzielnikaŭ niejtralnaja. Usie syšlisia na dumcy, što heta budzie padrychtoŭka kandydataŭ da nastupnych prezidenckich vybaraŭ, a vyniki nie majuć nijakaha značeńnia, bo ich praŭdzivaść i lehitymnaść vyklikajuć sumnieŭ jašče na etapie padrychtoŭki. Nie varta, adnak, admaŭlać, što «jość kandydaty z hodnaj prahramaj, jakija pry lepšych umovach mahli b niešta pamianiać i realizavać».
Taksama na sustrečy nam udałosia pahutaryć sa «staražyłami» «Pahoni», jakija ciaham amal čatyroch hadoŭ źjaŭlajucca aktyŭnymi ŭdzielnikami akcyj i mierapryjemstvaŭ, što pravodziacca pad ehidaj abjadnańnia. Maryna Citova padzialiłasia ŭražańniami ab niadaŭnim Maršy padniavolnych narodaŭ (akcyja salidarnaści z narodami, jakija akazalisia pad pryhniotam) i raspaviała, što sioleta kolkaść biełarusaŭ na mierapryjemstvie była rekordnaj: bolš za 100 čałaviek vyjšli sa ściahami na vulicy Ńju-Jorka 17 lipienia. U cełym, Maryna tolki paćvierdziła isnujučaje mierkavańnie, što, žyvučy ŭ emihracyi, usio čaściej pačynaješ šanavać kulturu rodnaj krainy i hanarycca svaim pachodžańniem, niachaj navat i davodzicca kožny raz tłumačyć amierykancam, dzie znachodzicca Biełaruś. Mienavita tamu «tradycyjnyja śviaty kštałtu Kupalla i Hukańnia viasny vyklikajuć taki vodhuk siarod biełarusaŭ u Amierycy, jakija z zadavalnieńniem źbirajucca razam i adpraŭlajucca na pošuki paparać-kvietki».
Adnym z napramkaŭ raźvićcia i pracy abjadnańnia ŭ bližejšyja miesiacy stanie jakasnaje aśviatleńnie ŭ ŚMI dziejnaści «Pahoni».
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary