U parku Čaluskincaŭ vahončyk «amierykanskich horak» naśmierć źbiŭ administratara
Trahiedyja zdaryłasia ŭdzień 22 žniŭnia.
«Ciapier tut chutkaja, voś užo chvilin 15 jak nie źjazdžaje, — raspavioŭ čytač partału Onliner.by. — Sam atrakcyjon ačapili i ŭsich adtul adhaniajuć. Užo viadoma, što mužčyna zahinuŭ. Tut jość ludzi, jakija jechali ŭ hetym vahončyku, kažuć, što mužčyna palez pa navušniki. Mabyć, dumaŭ, što paśpieje…».
Atrakcyjon sapraŭdy ačepleny, staić mašyna chutkaj. Na miescy zdareńnia pracujuć śledčyja.
«Siońnia paśla abiedu supracoŭnik atrakcyjona, mužčyna 1959 hoda naradžeńnia, zajšoŭ u zabaronienuju zonu padčas pracy atrakcyjona i byŭ traŭmavany kabinkaj, — paviedamiŭ «Našaj Nivie» Alaksiej Klimovič, aficyjny pradstaŭnik SK pa Minsku. — U vyniku ad traŭmaŭ jon pamior na miescy. U ciapierašni momant vyśviatlajucca abstaviny zdareńnia, pravodzicca pravierka».
Pa čutkach, mužčyna palez za navušnikami, jakija vypali z kišeni minułych naviednikaŭ atrakcyjona. Čamu jon vyrašyŭ zaleźci padčas ruchu kabinki — nieviadoma.
Darečy, «pasažyry» toj kabinki naŭprost syšli jašče da pryjezdu chutkaj i śledčych.
«Śledčyja šukajuć vidavočcaŭ i pasažyraŭ toj kabinki i prosiać ich źviarnucca ŭ Pieršamajski rajonny adździeł Śledčaha kamiteta ci patelefanavać pa telefonu 8-017-280-02-02», - skazaŭ Alaksiej Klimovič.
Pa słovach administracyi parka, atrakcyjon naležyć pryvatnaj kampanii TAA «Leta-Park», jakaja arenduje ŭ parka Čaluskincaŭ šerah placovak, na jakija stavić svaje atrakcyjony.
Pa słovach supracoŭnikaŭ parka, zahinuły pracavaŭ na atrakcyjonie ź minułaha hoda. Schilnaściu da ałkaholu nie vyłučaŭsia.
Atrakcyjon raniej užo «śviaciŭsia» u navinach. U siaredzinie maja tut zasieli ludzi na vyšyni 10 mietraŭ. Tady vyśvietliłasia, što «amierykanskija horki» sapraŭdy byli dastaŭlenyja ŭ park Čaluskincaŭ z Dreamland u pačatku 2015 hoda pa pryčynie nierentabielnaści na starym miescy.
Kamientary