U internecie źbirajuć hrošy na film pra rasiejca, biełarusa i ŭkrainku, jakija žyvuć razam u emihracyi VIDEA 16+
Na kraŭdfandynhavaj placoŭcy indiegogo.com prachodzić zbor hrošaj na film «ahaha» biełaruskaj režysiorki Ułady Siankovaj.
«Budapiešt. Try letucieńniki z postsavieckaj prastory pa źbiehu abstavinaŭ sustrakajucca pad strechami vienhierskaj kamunałki pad huki valsa i rok-n-roła. Jany naŭrad ci stali b siabrami doma, ale tut ich abjadnoŭvaje ahulnaja mova, jeŭrapiejskaja mara i hłybokaja adzinota. Adzinota jak kachańnie. Kachańnie biez praviłaŭ, pałavych adroźnieńniaŭ i litaści.
Haŭdzi i Dali, pacałunki Radena — kvitok 15 jeŭra, ale studentam źnižki, łate — abaviazkova makijata, inakš vam prosta naljuć małaka, akcyi ŭ H&M, tanny ałkahol, ale cyharety daražej, viazicie svaje, Bałonskaja sistema adukacyi, błakitnyja bierahi i hiej-kłuby, kuča bamžoŭ», — havorycca ŭ apisańni da proma-rolika.
Aściarožna, videa 16+:
Na płatformie indiegogo dla zdymak filma stvaralniki chočuć sabrać 200 000 dalaraŭ. NN pahutaryła z režysioram filmu Uładaj Siankovaj, jakaja raspaviała pra ideju i što jana choča danieści filmam da sučasnaj moładzi.
«Ideja i scenar śpieli niekalki hadoŭ. Ja jezdžu ŭ Jeŭropu časta, pastajanna pra heta dumaju. Letaś źjeździła ŭ Rym, pažyła tam 2 tydni. Kali skončylisia hrošy, vyjšła na płošču handlavać chend-mejdam, jaki pradbačliva ŭziała z saboj. Uraziłasia, uliłasia ŭ tusoŭku tych, chto tam staić — filipincy, turki i h.d. U Jeŭropie ja daviedałasia šmat taho, što mianie ŭraziła».
«Paśla viarnułasia dadomu. A tam naviny pra toje, što va Ukrainie znoŭ abvastrylisia bajavyja dziejańni. Usie adzin adnaho nienavidziać i dzielacca na łahiery. Ja hladžu na heta i ŭspaminaju, jak na płoščy handlujuć chłopčyki ź Biełarusi, jakija prapanujuć pasłuhi dziaŭčynak z Ukrainy. Razumieju, što sama ŭvieś čas žyvu adnoj nahoj u emihracyi. I majo pakaleńnie, pakaleńni ledź maładziej žyvuć niejkaj efiemiernaj jeŭrapiejskaj maraj, jakaja maje na ŭvazie asablivaje staŭleńnie adzin da adnaho, šyrokadumańnie, žadańnie padarožničać, nie śpiašacca zavodzić siemji, viehietaryjanstva i ŭvaha da ekałohii, mahčymaść być volnym u svajoj seksualnaj samaidentyfikacyi, pacyfizm, luboŭ da mastactva i hetak dalej».
Tak naradziłasia «ahaha». Dla mianie heta nie palityčnaje kino. Heta historyja pra čałavieka, a nie pra hramadzianina. Heta bieh čałavieka ad palityki da lepšaha žyćcia, da mahčymaści być svabodnym. Ale pierasiakajučy miažu, ty pašyraješ unutranyja miežy i ŭžo vielmi składana razumieć, dzie miaža pamiž tym, što dobra, a što kiepska. Ja adrazu viedała, što heta budzie try siabra pa źbiehu abstavinaŭ. Nu a ukrainka, biełarus i rasiejec naradzilisia niejak sami dziakujučy realijam, u jakich ja žyvu. Ja dumaju, što heta kino budzie karysna i Jeŭropie i postsavieckaj prastory, adkryje niekatoryja momanty ź inšaha boku dla ŭsich nas, nu i, viadoma, pryniasie emocyju i prymusić zadumacca, pa-inšamu pahladzieć na emihracyju, maładoje pakaleńnie, niejkija žadańnia i prablemy, nu i, mahčyma, choć niejak źnizić napał nianaviści adzin da adnaho».
Kažučy pra pasył, Ułada pryznałasia, što prytrymlivajecca pazicyi, što kožny čałaviek ŭsprymaje kino pa-svojmu:
«Ale hałoŭnaje, na čym ja bolš za ŭsio akcentuju ŭvahu heta toje, što maładoje pakaleńnie — voś jano, žyvoje, sapraŭdnaje, takoje, jakoje jość, sa svaimi prablemami, što maciukajecca, jakija robiać durnyja ŭčynki, ale volnymi ŭ vybary seksualnaj aryjentacyi, chaj heta i nie padabajecca postsavieckaj prastory, ale voś jano žyvoje, sumlennaje, rodnaje».
Kraŭdfandynhavaja kampanija praciahniecca da listapada hetaha hoda. U zaležnaści ad pamieru achviaravańnia praduhledžany roznyja padarunki i navat pasady ŭ filmie.
Kamientary