U Śvietłahorsku kamunalnyja słužby sprabujuć praz sud vysielić invalida-vazočnika Juryja Lašenku
U sudzie Śvietłahorskaha rajona praciahvajucca słuchańni pa isku KŽUP «Śvietač» da hramadzianskaha aktyvista Juryja Lašenki, invalida-vazočnika.
Kamunalniki patrabujuć, kab hramadzianin vyzvaliŭ manieŭranaje žyllo, dadzienaje jamu na čas kapitalnaha ramontu doma. Invalid-vazočnik admaŭlajecca ŭsialacca ŭ kvateru ŭ domie paśla kapramontu.
«Paśla kapitalnaha ramontu maja kvatera stała nieprydatnaja dla pražyvańnia. Pra biezbarjernaje asiarodździe i havorki niama. Paśla kapitalnaha ramontu ja nie mahu trapić u vannuju — unitaz ustalavany takim čynam, što ja pavinien niejak pieraskočyć jaho razam z vazkom. Parušeńniaŭ masa! Kapitalny ramont idzie z 2012 hoda, i stolki ž hadoŭ my viadziem baraćbu, kab naš dom byŭ prydatny dla pražyvańnia. Zaraz z vaśmi kvater zasielenyja čatyry, astatnija, jak i ja, mykajemsia chto dzie», — prakamientavaŭ Lašenka.
Pavodle jaho słoŭ, dom nie adpaviadaje supraćpažarnym normam — zamiest žalezabietonnaha pierakryćcia pry kapitalnym ramoncie była pakładzienaja staraja draŭlanaja dranica. Z množnymi parušeńniami pry kapitalnym ramoncie ŭžo nieadnarazova raźbiralisia roznyja nahladnyja orhany. Zaraz pavodle patrabavańnia prakuratury budzie pravodzicca budaŭniča-techničnaja ekśpiertyza. «U hetaj kvatery žyć niemahčyma, a kamunalniki patrabujuć vysielić mianie z manieŭranaha žylla biez davańnia inšaha žylla. I heta pry dziasiatkach parušeńniaŭ, u tym liku finansavych, dapuščanych pry kapitalnym ramoncie. U sud kamunalniki nieadnarazova padavali padroblenyja dakumienty, my na heta źviartali ŭvahu suda, ale, jak bačym, kamunalnym słužbam ŭsio sychodzić z ruk», — adznačaje invalid.
Pavodle jaho słoŭ, u sudzie vyśvietliłasia, što isnujuć try akty ŭvodu abjekta ŭ ekspłuatacyju, i niezrazumieła — jaki ź ich sapraŭdny. «Aryhinały aktaŭ nie padajucca, kamunalniki kažuć, što nibyta ich kanfiskavaŭ ABEZ, a z čaho ž tady kopii rabili?» — zadajecca pytańniem aktyvist.
Na minułych vybarach Lašenka bałatavaŭsia ŭ parłamient ad Biełaruskaj partyi «Zialonyja». Ciapier kanflikt z kamunalnymi słužbami, a taksama prablemy na pracy jon źviazvaje z naciskam na jaho miascovaj ułady z-za ŭdziełu ŭ vybarach u jakaści kandydata. «Ja dyrektar firmy pa pieravozkach. I ŭžo z hetaha boku sprabujuć da mianie padkapacca. Na adzin dzień my praterminavali techahlad, i ŭžo i ŭ transpartnaj inśpiekcyi, i ŭ DAI źjavilisia da nas pytańni, až da pazbaŭleńnia licenzii. Nibyta nieviadomaja žančyna, ananim, napisała skarhu, što jana jechała na našym maršrutnym taksi, u jakoha adsutničaŭ techahlad. Chiba zvyčajnyja pasažyry pytajucca ŭ vadziciela maršrutki ab prachodžańni techahladu i potym pišuć skarhi va ŭsie instancyi? Heta nacisk na mianie. Ja płaču padatki, papaŭniaju biudžet, pracuju ščyra, stvaraju pracoŭnyja miescy, a ŭzamien atrymlivaju žorstki presinh», — ličyć eks-kandydat.
Kamientary