Złučanyja Štaty planujuć praviadzieńnie biesprecedentnych tajemnych aperacyj suprać abjektaŭ u Rasiei ŭ adkaz na rasiejskaje ŭmiašańnie ŭ amerykanski pieradvybarčy praces, pieradaje telekampanija NBC sa spasyłkaj na krynicy ŭ amerykanskich raźviedsłužbach.
Pavodle źviestak NBC, specyjalistam CRU było dadziena zadańnie padrychtavać prapanovy ab kiberaperacyjach u Rasiei, meta jakich — vystavić kramloŭskaje kiraŭnictva ŭ niepryjemnym dla jaho vyhladzie. Pra jakija aperacyi idzie havorka, nieviadoma, ale ŭ rasparadžeńni amerykanskich specsłužbaŭ znachodzicca vielizarnaja kolkaść dakumentaŭ, źviazanych ź «niepryvabnaj», jak vykazalisia surazmoŭcy NBC, taktykaj Uładzimiera Pucina. Vice-prezydent ZŠA Džo Bajden zajaviŭ u interviju dla papularnaj prahramy Meet the Press, što Bieły dom daje syhnał Pucinu. «Heta adbudziecca ŭ momant, jaki my abiarom, u abstavinach, jakija dazvolać atrymać najbolšy efekt», — skazaŭ Bajden.
Abmierkavańni nakont adkazu na rasiejskija chakierskija ataki viaducca specyjalistami administracyi Abamy daŭno. Da hetaha času jany nie mahli pryjści da zhody, jakim pavinien być adkaz: ci pravieści tajemnyja kiberaperacyi, ci ŭvieści sankcyi suprać rasiejskaha kiraŭnictva.
7 kastryčnika ministerstva ŭnutranaj biaśpieki ZŠA i ŭpraŭleńnie nacyjanalnaj vyviedki krainy vypuścili sumiesnuju zajavu, u jakoj aficyjna abvinavacili rasiejskija ŭłady ŭ arhanizacyi kiberataki na amerykanskija palityčnyja struktury.
Kamientary