Dakumentalny film biełaruskaha kinarežysera Michaiła Ždanoŭskaha «Va ŭsie dni» atrymaŭ Hran-pry IV mižnarodnaha katalickaha festyvalu chryścijanskich filmaŭ i teleprahramaŭ "Mahnifikat-2008", jaki prajšoŭ 17—21 červienia ŭ Hłybockim rajonie Viciebskaj vobłaści.
Jak paviedamiŭ BiełaPAN staršynia festyvalu, kinarežyser Jury Haruloŭ, film M. Ždanoŭskaha raźvivaje temu, raspačatuju režyseram u 1990-ja hady stužkaj «Daroha na Kurapaty» pavodle scenaru A. Łukašuka.
Dakumentalny film «Va ŭsie dni», stvorany na kinastudyi «Biełaruśfilm», pryśviečany mastaku-ikanapiscu Anatolu Kuźniacovu, jaki na praciahu mnohich hadoŭ piša abrazy na kamianiach u narodnym nekropali Kurapaty na paŭnočna-ŭschodniaj ŭskrainie Miensku, dzie lažać dziasiatki tysiač achviaraŭ stalinskich represij 1930—1940-ch hadoŭ.
Na festyvali było pradstaŭlena 35 filmaŭ i teleprahram ź Biełarusi, Hruzii, Italii, Kanady, Łatvii, Livana, Litvy, Polščy, Rasii, ZŠA, Ukrainy, Francyi, Charvatyi i Švajcaryi. Zasnavalnikami tvorčaj akcyi, jakaja pravodzicca pad patranažam Kanferencyi katalickich japiskapaŭ u Biełarusi, źjaŭlajucca katalickaja asacyjacyja dla kamunikacyj «SIGNIS-Biełaruś», niezaležnaja studyja «Stopkadr», redakcyja relihijna-aśvietnickaha časopisu «Dyjaloh» (Baranavičy), a taksama Viciebskaja dyjacezija Biełaruskaj rymska-katalickaj carkvy. Festyval pravodzicca pry ŭdziele Hłybockaha rajonnaha vykanaŭčaha kamitetu.
Ciapier čytajuć
«Jana nie vyhladała ščyraj, była ŭ mascy». Paŭlučenka pra sustreču Kaleśnikavaj ź biełaruskimi žurnalistami23
Kamientary