«Forma adzieńnia paŭsiadzionnaja, pry sabie mieć humovuju pałku i kajdanki» — apublikavanyja instrukcyi dla milicyjantaŭ padčas apazicyjnych akcyj
U internecie źjavilisia kopii dakumientaŭ, u jakich apisanyja ałharytmy pracy supracoŭnikaŭ staličnaj milicyi da i padčas niesankcyjanavanych masavych mierapryjemstvaŭ.
U adkryty dostup kopii dakumientaŭ vykłali apazicyjnyja dziejačy Aleś Łahviniec i Antoś Žyłka. Apošni ź ich ubačyŭ hetyja papiery pry aznajamleńni z materyjałami administracyjnych spraŭ, zaviedzienych na jaho za ŭdzieł u niesankcyjanavanych akcyjach.
Havorka idzie pra rašeńnie načalnika Maskoŭskaha RUUS Aleha Šulakoŭskaha nakont arhanizacyi achovy hramadskaha paradku pry praviadzieńni ŭ Minsku «vierahodnych niesankcyjanavanych masavych mierapryjemstvaŭ» 12 vieraśnia i 19 vieraśnia 2016 hoda.
Načalnik RUUS paličyŭ nieabchodnym zasiarodzić asnoŭnyja namahańni na «pieraškodzie sprobam zachopu zbroi i bojeprypasaŭ, spynieńni faktaŭ vykarystańnia (vyviešvańnia) niezarehistravanych ściahoŭ, naniasieńnia jakich-niebudź nadpisaŭ, vyklučeńni mahčymaha ździajśnieńnia terarystyčnych aktaŭ, ekstremisckich prajaŭ i inšych supraćpraŭnych dziejańniaŭ» i hetak dalej.
Dalej jon vyznačaje zadačy dla roznych adździełaŭ RUUS. Da prykładu, supracoŭniki DAI pavinny dahladać aŭtamabili, kab vyjaŭlać i spyniać «fakty zachoŭvańnia, pieravozki zabaronienych pradmietaŭ, vybuchovych rečyvaŭ i niezarehistravanaj drukavanaj pradukcyi» i hetak dalej.
Ale bolš za ŭsio zadač stavicca pierad adździełam achovy pravaparadku i prafiłaktyki RAUS.
Naprykład, 12 vieraśnia jany pavinny byli z vaśmi hadzin ranicy sumiesna z rajonnymi ŽREA «arhanizavać pracu śpiecaŭtamašyn z padjomnikam dla svoječasovaha reahavańnia na mahčymyja supraćpraŭnyja dziejańni (vyviešvańnie niezarehistravanaj simvoliki, ściahoŭ, naniasieńnie nadpisaŭ), a taksama pracu dziažurnych bryhad u ŽESach dla svoječasovaha pryniaćcia mier pa vydaleńni jakich-niebudź nadpisaŭ i inšaj nieŭstanoŭlenaj atrybutyki».
Akramia taho, pierad akcyjaj jany pavinny byli razam z kamunalnikami abśledavać haryščy i vychady na dach budynkaŭ, a taksama vysokich damoŭ, «jakija možna razhladać jak snajpieroudobnyje pazicyi».
Prykładajecca płan-rasstanoŭka, dzie paznačany proźviščy milicyjantaŭ, jakija pavinny pracavać na akcyi, z ukazańniem ich zadač i pazyŭnych.
Da prykładu, na akcyi 12 vieraśnia musić byŭ prysutničać milicyjant z hrupy razjaśnienija. Pry sabie jon pavinien byŭ mieć miehafon, kamizelku, radyjostancyju, dubinku, kajdanki, lichtaryk i śvistok.
Akramia taho, u płanie-rasstanoŭcy značacca hrupy pa dakumientavańni ź videakamierami «ŭ cyvilnym», pa składańni pratakołaŭ, pa kantroli za haryščami i hetak dalej.
U HUUS Minharvykankama ŭ pryncypie nie stali admaŭlać najaŭnaść padobnych dakumientaŭ.
«Heta słužbovaja dakumientacyja orhanaŭ unutranych spraŭ, tamu abmiarkoŭvać jaje niemetazhodna. Skažu tolki, što pierad lubym mierapryjemstvam u Minsku — niachaj heta budzie hramadskaje, kulturnaje ci masavaje — robicca raźlik nieabchodnych sił i srodkaŭ, što adlustroŭvajecca ŭ padobnym dakumiencie», — paviedamiŭ BiełaPAN pres-sakratar HUUS Alaksandr Łastoŭski.
«Śvińni zarochkali. Biez vady daŭno nie siadzieli, ja b im adklučyŭ». Azaronak abrynuŭsia na žycharoŭ rajona Lebiadziny29
Kamientary