Alaksandr Łukašenka 15 śniežnia zaćvierdziŭ prahramu sacyjalna-ekanamičnaha raźvićcia Biełarusi na 2016—2020 hady, paviedamlaje pres-słužba biełaruskaha kiraŭnika.
Prahrama padrychtavanaja ŭradam na bazie asnoŭnych pałažeńniaŭ, uchvalenych raniej piatym Usiebiełaruskim narodnym schodam, jaki adbyŭsia 22—23 červienia 2016 hoda.
U dakumiencie dajecca acenka raźvićcia nacyjanalnaj ekanomiki ŭ 2011—2015 hadach, sfarmulavanyja mety, zadačy, pryjarytety i čakanyja vyniki sacyjalna-ekanamičnaha raźvićcia krainy ŭ 2016—2020 hadach.
Naroŭni z zachavańniem pierajemnaści kursu i bazavych asnoŭ biełaruskaj madeli raźvićcia vyznačanyja novyja instrumienty i miechanizmy realizacyi ekanamičnaj palityki.
«Pavyšeńnie jakaści žyćcia nasielnictva na asnovie rostu kankurentazdolnaści ekanomiki, pryciahnieńnia inviestycyj i inavacyjnaha raźvićcia vyznačana prahramaj jak hałoŭnaja meta raźvićcia Biełarusi. Dla jaje dasiahnieńnia ŭstanoŭlenyja aktualnyja pry isnujučych hłabalnych tendencyjach pryjarytety, na realizacyi jakich buduć skancentravanyja ŭsie ŭnutranyja i źniešnija resursy, skiravanaja rabota ŭsioj viertykali ŭłady», — havorycca ŭ paviedamleńni.
Siarod hetych pryjarytetaŭ: inviestycyi — jak krynica technałahičnaha abnaŭleńnia bazavych i farmiravańnia novych inavacyjnych halin ekanomiki; efiektyŭnaja zaniataść na novych pracoŭnych miescach z vysokaj pradukcyjnaściu — jak srodak vykarystańnia pracoŭnaha patencyjału i sacyjalnaj stabilnaści; ekspart — jak hałoŭnaja kropka prykładańnia namahańniaŭ dla zbałansavanaha ekanamičnaha raźvićcia.
Asnovaj rostu kankurentazdolnaści budzie inavacyjnaje raźvićcio, finansavaje azdaraŭleńnie realnaha siektara ekanomiki, źnižeńnie ŭsich vidaŭ vydatkaŭ, pavyšeńnie ŭkładu małoha i siaredniaha pradprymalnictva. Heta niepasredna źviazana z pryjarytetami piacihodki «Infarmatyzacyja» i «Moładź».
Infarmatyzacyja ŭniasie sistemny ŭkład u raźvićcio vysokatechnałahičnaha siektara ekanomiki, pierachod da ličbavaj ekanomiki, farmiravańnie spryjalnaha instytucyjnaha i biźnies-asiarodździa.
«Mienavita maładoje pakaleńnie zaklikana adyhrać vyrašalnuju rolu ŭ pierachodzie našaj krainy ad industryjalnaha da inavacyjnaha šlachu raźvićcia, ekanomiki viedaŭ. Tamu prahramaj praduhledžvajecca kompleksnaje pašyreńnie mier padtrymki moładzi», — adznačajecca ŭ paviedamleńni.
U dakumiencie taksama źmiaščajucca kankretnyja halinovyja zadačy, pry hetym akcent zrobleny na paskoranym farmiravańni novych vysokatechnałahičnych siektaraŭ ekanomiki.
Akramia taho, zadajecca viektar raźvićcia rehijonaŭ, padkreślivajecca ŭzrastańnie ich roli praz farmiravańnie centraŭ rostu. Raskryvajucca miery inviestycyjnaj, inavacyjnaj, biudžetna-padatkovaj, hrašova-kredytnaj i źniešnieekanamičnaj palityki.
Zachoŭvajecca sacyjalnaja nakiravanaść ekanamičnaj palityki. Dla hramadzian zabiaśpiečvajucca dastupnaść pasłuh achovy zdaroŭja, adukacyi, navuki, kultury i sportu niezaležna ad miesca ich pražyvańnia. Uzmocnicca adrasnaść i metavy charaktar dziaržaŭnaj padtrymki.
Buduć zroblenyja zachady i pa strymlivańni koštu kvadratnaha mietra žylla, jaki ŭ 2020 hodzie pavinien adpaviadać siaredniaj zarabotnaj płacie pa krainie.
Pavyšeńnie sacyjalnaj abaronienaści rabotnikaŭ płanujecca zabiaśpiečyć za košt štohadovaha ŭstanaŭleńnia pamieru minimalnaj zarabotnaj płaty na ŭzroŭni minimalnaha spažyvieckaha biudžetu ŭ siarednim na adnaho člena siam`i z čatyroch čałaviek.
Akramia taho, vyznačanyja novyja instrumienty i miechanizmy realizacyi ekanamičnaj palityki. Siarod ich — raźniavoleńnie dziełavoj inicyjatyvy, udaskanaleńnie adnosin ułasnaści, kantrolnaj dziejnaści i stvareńnie realnych umoŭ pa palapšeńni viadzieńnia biźniesu.
Adznačajecca, što z metaj vykanańnia pastaŭlenych prahramaj zadač uradam budzie raspracavany kompleks mier pa jaje realizacyi, jaki achoplivaje ŭsie napramki ekanamičnaj i sacyjalnaj palityki. Realizacyja zapłanavanych mierapryjemstvaŭ pavinna zabiaśpiečyć strukturnaje ŭdaskanaleńnie i pavyšeńnie kankurentazdolnaści ekanomiki, ustojlivy ekanamičny rost na zbałansavanaj asnovie.
U pryvatnaści, temp rostu vałavoha ŭnutranaha praduktu za piacihodździe prahnazujecca ŭ dyjapazonie 112,1—115%. Heta bolš jak udvaja vyšej u paraŭnańni ź minułaj piacihodkaj (105,9%). Inflacyja jak pakazčyk unutranaj zbałansavanaści da kanca piacihodki nie pieravysić 5%, pakazčyk źniešniaj zbałansavanaści — salda źniešniaha handlu — pačynajučy z 2017 hoda prahnazujecca ŭstojliva stanoŭčym.
Adnačasova rost realnych najaŭnych hrašovych dachodaŭ nasielnictva ŭ 2020 hodzie u adnosinach da 2015 hoda składzie 109,5—111,6%.
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku7
Kamientary