U Mahiloŭskaj vobłaści chočuć stvaryć pierasoŭnuju ekspazicyju pra žyćcio i tvorčaść Alesia Adamoviča

U Mahiloŭskaj vobłaści hramadskija aktyvisty prapanavali stvaryć pierasoŭnuju vystavu pra žyćcio i tvorčaść Alesia Adamoviča.

Nahadajem, 5 listapada 2016 hoda ŭ Mahilovie adbyŭsia kruhły stoł «Muziej Alesia Adamoviča: supracoŭnictva hramadskaści i ŭłady», zaklikany aktyvizavać zbor srodkaŭ na muziej piśmieńnika ŭ pasiołku Hłuša Babrujskaha rajona. Na kruhłym stale byŭ stvorany hramadski saviet pry abłasnoj arhanizacyi Tavarystva biełaruskaj movy, zadačaj jakoha źjaŭlajecca arhanizacyja pracy pa zbory hrošaj i pryciahnieńni ŭvahi da tvorčaści Adamoviča.

23 studzienia ŭ Mahiloŭskaj abłasnoj biblijatecy prajšło čarhovaje pasiadžeńnie savieta. U adroźnieńnie ad papiaredniaha, jaki prajšoŭ u śniežni, u im uziali ŭdzieł pradstaŭnik hałoŭnaha ŭpraŭleńnia ideałahičnaj raboty, kultury i pa spravach moładzi Jaŭhien Biełavusaŭ i pieršy sakratar Mahiloŭskaha abkama BRSM Pavieł Aleksa.

U chodzie siońniašniaj dyskusii było vyrašana arhanizavać pierasoŭnuju vystavu, pryśviečanuju žyćciu i tvorčaści Alesia Adamoviča, raskazała abranaja staršynioj savieta žurnalistka Neli Zihula. Miarkujecca, što ekspazicyja budzie składacca prykładna ź dziesiaci banieraŭ z fotazdymkami i infarmacyjaj pra piśmieńnika.

Pavodle słoŭ staršyni savieta, pakul orhanami ŭłady nie pryniata farmalnaha rašeńnia ab stvareńni muzieja Alesia Adamoviča. «Pradstaŭnik abłvykankama budzie ŭdakładniać, jak heta možna realizavać, kab isnavała aficyjnaje rašeńnie ab stvareńni muzieja. Ci mahčyma takoje rašeńnie naohuł», — skazała Neli Zihula, adznačyŭšy, što takoje rašeńnie dazvoliła b bolš aktyŭna źbirać hrašovyja srodki.

Padčas pasiadžeńnia členy savieta vykazali prapanovy nakont zvarotu da roznych arhanizacyj i asobnych hramadzian pa finansavuju dapamohu na stvareńnie muzieja. Tak, było vyrašana źviarnucca da abodvuch biełaruskich piśmieńnickich sajuzaŭ, u Fond miru, u Mižnarodny fond sacyjalna-ekanamičnych i palitałahičnych daśledavańniaŭ (Harbačoŭ-fond), u Dabračynny fond Mikałaja Simanava, da akcioraŭ, jakija syhrali roli ŭ filmach, źniatych pavodle tvoraŭ Alesia Adamoviča. Taksama pra jaho tvorčaść budzie havarycca na «Pysinskich čytańniach», jakija namiečany ŭ abłasnoj biblijatecy ŭ sakaviku.

«Kožny z členaŭ savieta ŭziaŭ na siabie rašeńnie niejkich pytańniaŭ. Adny — pa papularyzacyi idei stvareńnia muzieja, inšyja — na pierśpiektyvu dla zboru srodkaŭ na jaho budaŭnictva», — adznačyła Zihula.

Nahadajem, raniej piśmieńnica Śviatłana Aleksijevič pieraličyła abiacanyja joju 5 tys. dalaraŭ na stvareńnie muzieja Alesia Adamoviča. Usiaho ciapier sabrana kala 11,5 tys. rubloŭ. Na vyrab prajektna-kaštarysnaj dakumientacyi, pavodle słoŭ pradstaŭnika mahiloŭskaha Centra pa restaŭracyi Marata Abdulina, nieabchodna kala 12 tys. rubloŭ.

• 0
• 0
• 0
• 0
• 0
• 0
• 0
• 0