«Spytajcie ŭ Łukašenki, čamu jon ličyć maci, jakija vychoŭvajuć dziaciej, darmajedkami»

My atrymali voś taki list ad čytački Maryi (adras u Redakcyi):

«Pavažanaja redakcyja! U artykule «Łukašenka 3 lutaha ładzić «Vialikuju Razmovu z prezidentam» napisana, što «ad «Našaj Nivy» na pres-kanfierencyi budzie namieśnik redaktara Źmicier Pankaviec».

Kali łaska, paprasicie spadara Źmitra spytać u hr-na Łukašenki, čamu jon ličyć maci, jakija vychoŭvajuć dziaciej da 10 hadoŭ, darmajedkami?

Jak uvohule možna było da hetaha dadumacca?! Bo navat Ministerstva pa padatkach i zborach vychodziła va ŭrad z prapanovaj vyklučyć maci, jakija vychoŭvajuć dziaciej da zakančeńnia imi pačatkovaj škoły, ź liku płacielščykaŭ hetaha biesčałaviečnaha, antykanstytucyjnaha i h.d. i da t.p. zboru!

Navat pry SSSR była farmuloŭka pry zvalnieńni pa ŭłasnym žadańni: «Pa dohladzie za dziciom da 14 hadoŭ» Da 14-ci! A tut u 7 hadoŭ dzicia ŭžo samo pavinna adno i ŭ škołu, sa škoły chadzić, i ježu sabie hatavać (dy navat kali i razahravać), i pa horadzie pieramiaščacca (kali zajmajecca jakim sportam, muzykaj, tancami i h.d.). Ab biaśpiecy samastojnaha pieramiaščeńnia dziciaci pa Miensku i naohuł kazać niama čaho (DTZ, zhvałtavańnie na Maskoŭskim aŭtavakzale i h.d.). A chiba biaśpiečna takomu maleńkamu dziciaci adnamu doma znachodzicca?! Kolki vypadkaŭ hibieli dziaciej, jakich pakidali adnych (tut tabie i pažary, i ŭsio astatniaje…) A kali što nie daj Boh zdarycca, to, biezumoŭna, baćki vinavatyja: nie zabiaśpiečyli biaśpieku i h.d.

A pracy na čas, pakul dzicia ŭ škole (z 8.30 da 11.50), niama ni ŭ Miensku (pravierana asabista), ni ŭ inšych haradach. (Pra 50 tysiač novych pracoŭnych miescaŭ — chłuśnia. Jany kali i jość, to tolki ŭ spravazdačach čynoŭnikaŭ.) I babul-dziadulaŭ niama, jakija mahli b uziać na siabie kłopat pra dzicia. I na nianiu nie zarabić z našymi ciapierašnimi realnymi zarobkami.

Z takim staŭleńniem da žančyn i maci, jak ciapier, chutka naohuł nie budzie kamu pracavać, kab u budučyni piensijanieram choć niejkuju piensiju płacić.

Chaču napisać artykuł na hetuju temu, ale na heta patrebny čas (ja ž nie žurnalist, a prostaja mama), a «sustreča» ŭžo 3-ha lutaha… Dy i zadać takoje pytańnie ŭ vočy inšaha šancu nie vypadzie (a prostamu čałavieku takaja mahčymaść i naohuł nie vypadzie nikoli).

Kali łaska, dapamažycie danieści ŭsio heta da Łukašenki.

P.S. I pra nibyta prava miascovych vykankamaŭ vyzvalać ad vypłaty indyvidualna ludziej «u suviazi ź ciažkimi žyćciovymi abstavinami», taksama chłuśnia. Nikoha jany nie vyzvalajuć (moža, tolki 1-2 z tysiač (dy i toje dla spravazdačnaści). A pa abstavinach, apisanych mnoju vyšej, tym bolš nikoha nie vyzvalać.

Zahadzia vam udziačnaja!

Z pavahaj, vaš stały čytač Maryja».

• 0
• 0
• 0
• 0
• 0
• 0
• 0
• 0