Biełaruski dobraachvotnik z «Pravaha siektara» pierajšoŭ miažu z Polščaj i atrymaŭ palitprytułak
Rustam Dok, biełaruski dobraachvotnik va Ukrainie, eks-bajec bataljona «Danbas» NHU, eks-bajec DUK PS atrymaŭ palitprytułak u Polščy. Pra heta jon paviedamiŭ na svajoj staroncy ŭ Facebook:
«Nie adzin raz ja, jak i inšyja, biezvynikova padavaŭ dakumienty dla atrymańnia abiacanaha Parašenkam hramadzianstva. Kali stała zrazumieła, što prezident nachabna i cynična chłusić, padaŭ dakumienty choć by na biežanstva, ale i ŭ biežanstvie ŭkrainskaja Mihracyjnaja słužba dała admovu «u suviazi ź vidavočnaj nieabhruntavanaściu bojazi», a nieaficyjna — «u suviazi z zahadam z Administracyi prezidenta Ukrainy i ŭ suviazi z tym, što Rasieja i Biełaruś — dobryja demakratyčnyja dziaržavy, dzie nikomu ničoha nie pahražaje». Tamu ŭ žniŭni 2016 hoda ja nielehalna pierajšoŭ miažu z Polščaj, a paśla tydniovaha maršu pa lesie i harach užo na polskim baku źviarnuŭsia z prośbaj pra prytułak».
Rustam napisaŭ na svajoj staroncy ŭ sacyjalnaj sietcy, što siońnia jamu pryjšoŭ list z paćviardžeńniem statusu biežanca.
Vysnova z usiaho hetaha tolki adna: usio, što nie zmahła i nie zmoža Ukraina — zmahła i zmoža Polšča. Asobnaje «pryvitańnie» i «dziakuj» tym, chto kryčaŭ i praciahvaje kryčać, što ŭ zamiežnych dobraachvotnikaŭ va Ukrainie «usio dobra», — dadaje jon.
Raniej dva biełarusy, Źmicier Biełahorcaŭ i «Dok», što dapamahali ŭkraincam na vajnie, zdalisia polskim pamiežnikam adrazu paśla taho, jak vyjechali z Ukrainy. Uvieś hety čas jany znachodzilisia ŭ polskim centry dla ŭciekačoŭ. «Biełsat» parazmaŭlaŭ z ukrainskim palitykam Iharam Huziem pra situacyju vałancioraŭ-biełarusaŭ, jakija nie dačakalisia ŭkrainskich dakumientaŭ i ciapier šukajuć prytułku ŭ Polščy.
U 2014 hodzie, adzin ź ich, Rustam «Dok» pryniaŭ rašeńnie pajechać va Ukrainu, kab sa zbrojaj u rukach abaraniać hetuju krainu ad rasiejskich akupantaŭ u składzie ŭkrainskaha bataljona «Danbas». Pavodle jaho, litaralna adrazu ž ułady Ukrainy ŭziali jahonia dadzienyja nibyta dla pradstaŭleńnia ŭkrainskaha hramadzianstva i vydačy aficyjnych dakumientaŭ sałdata Nacyjanalnaj Hvardyi Ukrainy, i ŭvosień taho ž hoda hetyja samyja dadzienyja apynulisia ŭ rukach u sieparatystaŭ i ŭ internecie.
«Praz hetaje na majoj vučobie, pracy, kvatery i žyćci ŭ Biełarusi možna było pastavić kryž», — kaža jon na svajoj staroncy ŭ Facebook. — «Pačynaju novaje žyćcio», — padsumoŭvaje jon.
Kamientary