«Ty zachłyniešsia ŭ rešcie rešt svajoju słavaju kryvavaj»
Broŭka? Krapiva? Łužanin? Kamu adrasavany vierš-praklon Duboŭki? Piša Michaś Skobła.
«Čamu ŭ Duboŭki niama pratestu, a jość tolki žal?
U mužčyny heta niecikava», - pisała Łarysa Hienijuš siabru Mikołu Praškoviču 26 sakavika 1965 h. Łarysa Antonaŭna nie mahła viedać «pratestnych» vieršaŭ Uładzimiera Mikałajeviča, bo lažali jany ŭ patajemnych šufladach.
Pryviedzieny nižej pakazaŭ mnie ŭ svoj čas Maksim Łužanin, nazvaŭšy imia adrasata: Piatruś Broŭka.
U ramanie «Dzień Śviatoha Patryka» Hanny Sieviaryniec vierš adrasavany Kandratu Krapivie. A daśledčyk Dźmitry Davydoŭski, spasyłajučysia na ŭspaminy Duboŭkavaj žonki, śćviardžaje: vierš adrasavany… Łužaninu.
Budziem spadziavacca, što ŭ kamientarach da Dvuchtomavika Duboŭki, na jaki hetymi dniami zakančvajecca padpiska, usie kropki nad ï buduć urešcie rasstaŭlenyja.
I ŭsio ž - chto? Broŭka? Krapiva? Łužanin?
Padobny z tvaru da maščej,
A pa dušy daŭno niabožčyk,
Ty žyŭ jašče, stary kaščej,
Usio minaješ chatu z doščak.
Žyvieš i sochnieš - miljanier!
Adchvatčyk premijaŭ i łaŭraŭ,
Aby nakałupaŭsia vierš,
Adrazu ładziš hrom litaŭraŭ.
A šmat kaho paprybiraŭ,
Kab na šlachu nie zaminali,
I vyjšaŭ sucha z mokrych spraŭ
Dy vystukaŭ jašče miedali.
Ty straciŭ by i zrok, i słych,
Kali b sudzić ciabie źjavicca
Mahli Symon Baranavych,
Makar Šałaj, Symon Kunicki.
Ich bieź viny i biez pary
Biada źmiała ŭ apošni vyraj.
Ci nie darma tvaje siabry
Byli z taboj zanadta ščyra?
Ty dumaješ, zhubiŭsia znak,
Zabyty słovy, ściorty kroki,
I čas minuŭ, i śviedak brak? -
A ja, a Boh, a śviet šyroki?
Znaćcia ŭ ludziej nie adbiareš,
Jak ty ni ŭpraŭny na raspravy,
Dy zachłyniešsia ŭ rešcie rešt
Svajoju słavaju kryvavaj.
Pravin nie źmieściš na harbie,
Na šyju źvi sabie viaroŭku.
Biez pryvitańnia da ciabie,
Z truny - Uładzimir Duboŭka.
R. S.
Čamu z truny? Apaski mienš.
Chaču krychu pažyć siahońnia,
A to da času ŭ žvir sapchnieš,
Jak hety vierš ciabie dahonić.
Kali ž advieješ ty, jak dym,
Moj zapaviet nakont viaroŭki,-
Śviet ździejśnić sam, śviet maje čym…
Klanusia baradoj Duboŭki.
* * *
Ciapier čytajuć
Babaryka: Nie mohuć zdymacca sankcyi z pradpryjemstvaŭ i ludziej, zadziejničanych u vajnie. Vypuścicie palitviaźniaŭ canoj zabojstva ŭkraincaŭ?27
Babaryka: Nie mohuć zdymacca sankcyi z pradpryjemstvaŭ i ludziej, zadziejničanych u vajnie. Vypuścicie palitviaźniaŭ canoj zabojstva ŭkraincaŭ?
Maksim Znak pra pres-kanfierencyju va Ukrainie: My damovilisia nie ŭzdymać najbolš balučyja temy — katavańniaŭ, sankcyj, vajny. Moža, musili my pa-inšamu zrabić88
Maksim Znak pra pres-kanfierencyju va Ukrainie: My damovilisia nie ŭzdymać najbolš balučyja temy — katavańniaŭ, sankcyj, vajny. Moža, musili my pa-inšamu zrabić8
Za dva dni na vyratavalny ŭkoł Ksiušy z Mahilova sabrali rekordnyja $300 tysiač. Mama zdała jaje ŭ dzietdom, a čužyja ludzi bjucca za žyćcio dziciaci55
Kamientary