Partał daślednickaj žurnalistyki Belsled.org apublikavaŭ sieryju materyjałaŭ, jakija krytyčna analizujuć aficyjnyja vyniki biełaruskich vybaraŭ, pačynajučy z 2006 hoda. Jany davodziać, što aficyjnyja zaćvierdžanyja źviestki ŭ pryncypie niemažlivyja, bo supiarečać univiersalnym zakonam matematyki i łohiki. Krytyčny analiz supravadžaje darečnaja infahrafika. Aprača taho, partał raźmiaščaje sieryju artykułaŭ, jakija na jarkich prykładach tłumačać, jakija čynam u Biełarusi adbyvajucca vybarčyja manipulacyi.
Anamalnaja statystyka, na jakuju raniej nichto ci mała chto źviartaŭ uvahu: z aficyjnych źviestak vynikaje, što na vybarach 2006 hoda ŭ bolšaści rajonaŭ Mahiloŭščyny nichto nie addaŭ hołas «suprać usich», a ŭ dvuch rajonach krainy hety pakaźnik uvohule mienšy za nol! Na tych samych vybarach jak byccam tolki 22 čałavieki z 11 tysiač vybarcaŭ Chocimskaha rajona nie ŭziali ŭdzieł u vybarach. Jaŭka — 99,8%, i heta ŭ prymiežnym rehijonie, dzie šmat chto źjazdžaje na zarobki ŭ susiedniuju Rasiju!
Albo inšyja dzivosy: padčas parłamienckich vybaraŭ-2012 u Homieli na praciahu dźviuch hadzinaŭ hałasavańnia na ŭčastki nibyta pryjšli 115 tysiač čałaviek! Takoj kolkaści haradžan na vulicach horada, badaj, nie było nikoli ŭ historyi. Albo nadzvyčaj vysokaje hałasavańnie pa miescy znachodžańnia, kali pa niekatorych rajonach Biełarusi doma prahałasavała ledź nie pałova ŭsich vybarcaŭ asnoŭnaha dnia.
Niechta jašče vieryć padlikam Lidzii Jarmošynaj?..
Kamientary