Siarhiej Kalakin pra Mikołu Statkieviča: «Jon albo ahient, albo durań». Za kandydataŭ ad ADS pa ŭsioj krainie ŭžo padpisałasia bolš za 50 tysiač vybarščykaŭ. Šeść pretendentaŭ na deputactva užo zmahli sabrać bolš za tysiaču podpisu, nieabchodnych dla rehistracyi.
Z nahody zaviaršeńnia pieršaha etapu parlamenckaj kampanii — vyłučeńnia i rehistracyi inicyjatyŭnych hrup — pradstaŭniki ADS dali pres-kanferencyju, dzie padviali pieršyja pramiežkavyja vyniki.
Ahułam vyniki rehistracyi inicyjatyŭnych hrupaŭ byli acenienyja jak «liberalnyja». Z 103 vyłučencaŭ ad ADS byli zarehistravanyja 100 inicyjatyŭnych hrup (23,7 % ad ahulnaj kolkaści ŭsich zarehistravanych). Siem čałaviek ź śpisu ADS navat nie sprabavali zarehistravacca. Ahułam u inicyjatyŭnyja hrupy demakratyčnych kandydataŭ uvajšło bolš za 3 tysiačy čałaviek.
«My zadavolenyja hetym vynikam. Razam z tym isnujuć vidavočnyja supiarečnaści: z adnaho boku ŭłada zacikaŭlenaja ŭ lehimityzacyi pałaty pradstaŭnikoŭ, a z druhoha boku my bačym pastajannyja najezdy na našych kandydataŭ i siabroŭ ich inicyjatyŭnych hrup. Na hety raz ułady dziejničajuć nie ahłoblaj, a bolš tonka», — kaža vykonvajučy abaviazki staršyni BSDP Anatol Laŭkovič.
Viktar Karniajenka z Ruchu «Za svabodu», jaki kaardynuje kampaniju ADS «Za Svabodnyja vybary» kaža:
«Nia tolki ŭłada pamianiała taktyku, ale i my. U nas jość ahulny śpis kandydataŭ, ź jakim uładam treba ličycca. Ciapier idzie vyłučeńnie siabroŭ učastkovych vybarčych kamisij. My vyłučajem dzieści paŭtary tysiačy čałaviek u hetyja kamisii. Naturalna, što zakryć usie nia ŭdasca, bo jość prablema ludzkoha resursu».
U tym liku i ad etapu ŭklučeńnia siabroŭ palityčnych partyj va ŭčastkovyja kamisii budzie zaležyć farmat dalejšaha ŭdziełu ADS u parlamenckaj kampanii.
Lider PKB Siarhiej Kalakin havoryć pra toje, što dziaržaŭnyja ŚMI naŭmysna zamoŭčvajuć temu vybaraŭ.
«Vybaraŭ nibyta i niama ŭvohule! U dziaržaŭnych ŚMI jany adsunutyja na druhi plan. Sapraŭdy, ludzi mohuć pačać analizavać, što zrabiŭ ich deputat, ci varta znoŭ jaho padtrymlivać», — zaznačaje lider apazycyjnych kamunistaŭ.
Paprasili žurnalisty vykazacca i nakont druhoha śpisu demakratyčnych kandydataŭ, majecca na ŭvazie «Eŭrapiejskaja kaalicyja». Siarhiej Kalakin byŭ u dadzienym pytańni dosyć emacyjny (pa jahonaj akruzie idzie lider «eŭrapiejcaŭ» Mikoła Statkievič).
«Niama tut čaho kamentavać. Ničoha dobraha pracesu demakratyi ŭ Biełarusi druhi, treci ci siomy śpis nie daje. Jon nie prynosić nijakaj karyści — heta niadobraja sprava. Śpis kandydataŭ ad ADS farmavaŭsia adkryta. Za traplańnie ŭ jaho zmahalisia ludzi. Što takoje śpis EK mnie skazać ciažka», — kaža S.Kalakin.
Va ŭnison ź im havoryć i Anatol Laŭkovič: «Heta sproba pijaru tych ludziej, jakija nie zmahli trapić u naš śpis».
Jašče bolš rezkim Kalakin byŭ, kali pačaŭ havaryć pra vyłučeńnie Mikoły Statkieviča:
«Mnie ciažka zrazumieć, navošta jon heta robić. Čałavieka ničoha nia źviazvaje z hetaj akruhaj, u jaho niama tam partyjnaj struktury. I jašče adzin momant — Mikoła Statkievič nia maje prava balatavacca na hetych vybarach, bo ź jaho nia źniataja sudzimaść. Čamu jahonuju inicyjatyŭnuju hrupu zarehistravali — taksama zahadka. U mianie tut dźvie versii: albo Statkievič ahient, albo durań. Adnak i ŭ pieršy, i ŭ druhim varyjancie z čałaviekam damaŭlacca niemahčyma».
Usie ŭdzielniki pres-kanferencyi zhadžalisia, što vielmi ciažka źbirać podpisy. Ludziej niama ŭ haradoch, jany ci na leciščach, ci ŭ adpačynku. Z tych, što zastajucca daloka nia ŭsie navat viedajuć pra vybary. U lubym vypadkam za kandydataŭ ad ADS pa ŭsioj krainie padpisałasia bolš za 50 tysiač vybarščykaŭ. Šeść čałaviek užo zmahli sabrać bolš za tysiaču podpisu, nieabchodnych dla rehistracyi.
Źmicier Pankaviec
Fota Ŭładzia Hrydzina
Ciapier čytajuć
«Siadzieŭ užo 50 sutak, zatrymali jaho dziaŭčynu i brata». Sukamiernik raskazaŭ pra radyjoamatara, aryštavanaha za zdradu dziaržavie4
Kamientary