Stvaralniki novaha hrodzienskaha taksi «Vydatnaje» źviarnulisia da nacyjanalnych matyvaŭ: aŭtamabili abklejenyja uzorami z vyšyvanak, a dyśpietčary razmaŭlajuć na biełaruskaj movie, piša Hrodna.life ca spasyłkaj na Autogrodno.by.
Usie aŭtamabili pieravozčyka abklejenyja roznymi arnamientami. Kožny arnamient niasie ŭ sabie sens. Da prykładu, znak na fota nižej aznačaje «bahaćcie».
Hetyja mašyny raniej pracavali ŭ inšaj bujnoj hrodzienskaj firmie taksi, dy i ŭładalnik «Vydatnaha» Alaksiej Biełakurski na hetym rynku z 2012 hoda.
— Z nas užo žartujuć, što ŭ bahažniku my vozim bulbu, a pasažyraŭ častujem dranikami. Mahčyma, tak i budzie. A pakul imkniomsia padtrymlivać hutarki z pasažyrami na biełaruskaj movie, kali klijent nie suprać, viadoma, — raspaviadaje Alaksiej.
Dyśpietčarki ŭ słužbie — biełaruskamoŭnyja.
— Pierad naboram dziaŭčat dla pracy ŭ dyśpietčarskaj my ŭsich žadajučych papiaredžvali, što razmaŭlać treba budzie na rodnaj movie. My pryjemna ździŭlenyja, dziaŭčyny pazityŭna ŭspryniali naša pažadańnie, — kaža Alaksiej.
Dyśpietčarka Julija raspaviała, što kali pačała prymać zakazy na biełaruskaj movie, niekatoryja hrodziency ad niečakanaści pačynali paśmiejvacca i kazać, jak heta vydatna. Byli vypadki, kali ludzi pačynali razmaŭlać na ruskaj, a potym mimavoli pierachodzili na biełaruskuju i praciahvali tak, jak byccam razmaŭlajuć na rodnaj movie štodnia. Ale čaściej razmova z taho boku telefona adbyvajecca na ruskaj, tolki ŭ kancy hrodziency dadajuć «Dziakuj» albo «Čakaju».
— Za hety tydzień tolki adna žančyna paprasiła razmaŭlać na ruskaj, a adzin chłopiec nie zrazumieŭ, što značyć «Čakajcie 5-7 chvilin». Ale naohuł, reakcyja pazityŭnaja i pretenzij nie było. Stvarajecca ŭražańnie, što hrodziencam padabajecca. Časam navat kiroŭcy paviedamlajuć, što padčas pajezdki pasažyry razmaŭlali ź imi na biełaruskaj. My starajemsia ŭdaskanalvać movu našych kiroŭcaŭ. Pa racyi havorym ź imi na biełaruskaj, — patłumačyła Julija.
Inšyja padrabiaznaści pra novuju słužbu taksi možna znajści pa spasyłkach vyšej.
Ciapier čytajuć
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii1212
Kamientary